Në Galerinë e Arteve në Ferizaj u mbajt promovimi i librit “Kujtesa, historia, identiteti” të autorit Isuf Berisha. Ky studim trajton problematikën e identiteteve në Kosovën e pasluftës, me theks të veçantë në marrëdhënien ndërmjet identitetit kombëtar shqiptar dhe atij kosovar.
Promovimi nisi me leximin e recensionit të Prof. dr. Lino Veljakut nga Universiteti i Zagrebit, recensent i librit, i cili e vlerëson veprën për qasjen e saj filozofike dhe metodologjike, si dhe për kontributin në shqyrtimin kritik të çështjeve të identitetit.
Për librin folën Prof. dr. Astrit Salihu, profesor në Universitetin e Prishtinës, dhe Enver Zhinipotoku, profesor i filozofisë.
Në kumtesën e tij, Prof. Salihu u ndal te karakteri dinamik dhe kompleks i identitetit, duke theksuar rëndësinë e një qasjeje përfshirëse, e cila nuk i vendos identitetin kombëtar shqiptar dhe atë kosovar në marrëdhënie përjashtuese, por i shqyrton në kontekstin e ndryshimeve historike, politike dhe shoqërore.
Ndërkaq, profesori Zhinipotoku e trajtoi këtë problematikë nga këndvështrimi historik dhe politik, duke sjellë në vëmendje debatet publike rreth identitetit kosovar, qëndrimet e ndryshme të intelektualëve dhe zhvillimet që kanë ndikuar në formësimin e kësaj çështjeje në Kosovë.
Në përmbyllje të aktivitetit, të pranishmëve iu drejtua edhe autori i librit, Isuf Berisha, i cili ndau me të pranishmit pikëpamjet dhe motivet që qëndrojnë pas kësaj vepre.
Aktiviteti u moderua nga Zyrafete Shala, fotografitë dhe videoincizimet u realizuan nga Fatmir Vata, ndërsa për zërimin u përkujdes Kujtim Shabani.
Promovimi vuri në pah rëndësinë e trajtimit të çështjeve të identitetit përmes studimit, argumentimit shkencor dhe mendimit kritik, duke dëshmuar nevojën për një debat të hapur dhe të përgjegjshëm mbi këto problematika.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
