MIT KS
Fillimi / Lajmet / Kumnova: Biri im, dy dekada të kërkova rrugëve të Kosovës por nuk e gjeta asnjë shenjë tënden që të çmallem me ty
Nestrete Kumnova: Biri im mbi dy dekada të kam kërkuar rrugëve të vendlindjes sate, por nuk e gjeta asnjë shenjë që të çmallem me ty

Kumnova: Biri im, dy dekada të kërkova rrugëve të Kosovës por nuk e gjeta asnjë shenjë tënden që të çmallem me ty

Kryetarja e shoqatës “Thirrjet e Nënave” në Gjakovë, Nesrete Kumnova, ka kujtuar 20 vjetorin e vrasjes së djalit të saj Albionit. Përmes një shkrimi në rrjetin social ajo shkruan: “Biri im i dashur, mbi dy dekada të kam kërkuar rrugëve të vendlindjes sate, Gjakovës dhe Kosovës, që u çlirua me gjakun tënd dhe të gjithë të rënëve, por askund nuk të gjeta! Nuk arrita të gjej asnjë shenjë që të çmallem me ty, të flas me ty! Me kënd të flet nëna, që për dy dekada më kanë mbuluar rrudhat e jetës por asnjëherë nuk jam lodhur e as nuk kam ndaluar së kërkuari zbardhjen e fatit tënd, bir!”.

Postimi i plotë:

Sot është 31 marsi, biri im Albion, dita kur shënon njëzetë e një vjetorin e kobshëm, të rrëmbimit, vrasjes dhe zhdukjes tënde nga duart kriminale të policisë serbe.
Biri ynë, Albion, në shtëpinë tonë ku ndodheshin të strehuar, bashkë me ty, u rrëmbyen, vranë dhe zhdukën, nga policia serbe edhe nipi im Artan Efendija, dhëndri Gëzim Deva, fqinjët, Lutfi e Bekim Bunjaku dhe Shkëlzen Binishi!
Biri im i dashur, mbi dy dekada të kam kërkuar rrugëve të vendlindjes sate, Gjakovës dhe Kosovës, që u çlirua me gjakun tënd dhe të gjithë të rënëve, por askund nuk të gjeta!
Nuk arrita të gjej asnjë shenjë që të çmallem me ty, të flas me ty! Me kënd të flet nëna, që për dy dekada më kanë mbuluar rrudhat e jetës por asnjëherë nuk jam lodhur e as nuk kam ndaluar së kërkuari zbardhjen e fatit tënd, bir!
Dhe sot, 21 vjet më pas, sërish nuk mund të dalim as tek pragu i derës, nga një tjetër armik i padukshëm që sërish na mbylli në shtëpitë tona e që po merr jetë të pafajshme në mbarë globin!
Mbase shpresonim se më në fund do të përfundoj çështja e zbardhjes së fatit tënd por nga ky armik I padukshëm, mbase u ndal edhe procesi i kërkimit të fatit tënd dhe të gjithë atyre që rezultojnë të zhdukur!
Sot e çdo ditë më shumë, jam e zhgënjyer nga të gjithë ata që janë përgjegjës dhe nuk u angazhuan mjaftueshëm sa për të na qetësuar zemrat tona të plagosura, të sjellin më në fund trupin tënd dhe të të vizitoj tek varri yt i cili të pret vite me radhë!
Nuk e kuptoj si mund të vazhdoj jetën pa ty, pa asnjë gjurmë, por ja që nënën e mban krenaria për qenien tënde, për gëzimet që na i dhurove, për sukseset sa ishe në jetë!
Biri im, Albion, vetëm krenaria që të patëm dhe që u flijove për lirinë e Kosovës, e mund dhembjen tonë të madhe!
Albion, biri im, sot nëna nuk mund të dalë as në qendër të qytetit dhe të protestoj, të flas botërisht për dhembjen dhe pikëllimin, pritjet dhe zhgënjimin!
Atdheut ia fale jetën, atdheu të pret të prehesh i qetë në tokën e lirë!

Kontrolloni gjithashtu

Kryetari i Kosovës, Hashim Thaçi, ka përkujtuar heroin, Mensur Zyberaj në përvjetorin e rënies së tij

Kryetari i Kosovës, Hashim Thaçi, ka përkujtuar heroin, Mensur Zyberaj në përvjetorin e rënies së tij

Kryetari, Hashim Thaçi, ka përkujtuar heroin, Mensur Zyberaj e dëshmorë të tjerë në përvjetorin e ...