Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ministrja e Drejtësisë, Albulena Haxhiu merr në mbrojtje, Xhelal Sveçlën, ndërsa kritikon Prokurorinë pse nuk i ka reaguar Beogradit zyrtar, lidhur me arrestimin e disa ish zyrtarëve serbë, në Kosovë të pandehur për krim ekonomik dhe korrupsion. Zonja Haxhiu shkruan se deklaratat e Sveçlës nuk janë ndërhyrje në punën e Prokurorisë, por sipas saj punën e prokurorisë e paskan penguar ndërhyrjet e shumta në sistem si pasojë e të cilave nuk paska pasur veprime serioze në drejtim të luftës ndaj krimit të organizuar. Lidhur me këtë reagim, logjikisht shtrohet pyetja se kush ka qenë dashur dhe duhet të reagojë në akuzat e Beogradit zyrtar.
Nuk ka vend në botë ku në raste të tilla reagon Prokuroria, pasi ajo nuk merret me politikën e Shtetit, por janë pikërisht institucionet qeveritare, ato që merren me reagime dhe bëjnë politikat e caktuara.
Urrejtja që ka zonja Haxhiu, pastaj Xhelali i Sveçlës e të tjerë kundër Prokurorisë së Kosovës, kundër Këshillit Prokurorial të Kosovës, i cili ka ndërprerë edhe bashkëpunimin me Ministrinë, për shkak të sulmeve të pamatura të kryesueses së kësaj ministrie, është shtuar edhe më tej për shkak të përgjigjes injoruese që mori Ministria e Drejtësisë nga “Komisioni i Venecias”, lidhur me krijimin e SPAK-ut të markës: Kurti-Haxhiu.
Lufta që i ka shpallur Prokurorisë së Kosovës, zonja Haxhiu, është ashtu sikur lufta e Sali Berishës kundër Theodori Sollakut, shumë vite më parë, meqë ajo pretendon të emërojë një prokuror nga Vetëvendosja, i cili do të anashkalonte dosjet, për shumë veprime delikuente të Vetëvendosjes, në atë mes edhe të vetë ministres, Albulenë Haxhiu, gjatë 15 viteve në opozitë, veprime të cilat i kanë anashkaluar të gjitha qeveritë në pushtet, jo pse nuk kanë qenë veprime serioze dhe penale, por sepse i kanë shpërfillur me mendjemadhësi duke i injoruar ato dhe duke i trajtuar vetëm si kundërvajtje, me ç’ rast kanë shkelur edhe vetë ligjet në fuqi. (RKL)
