Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ambasadori amerikan në NATO, Matthew Whitaker, ka vlerësuar vizitën e tij të fundit në Kosovë si një hap të rëndësishëm në thellimin e bashkëpunimit strategjik ndërmjet dy vendeve, duke theksuar rolin vendimtar të SHBA-së në forcimin e sigurisë dhe kapaciteteve mbrojtëse të Kosovës. Në një reagim publik, ai nënvizoi se për më shumë se 26 vjet, Shtetet e Bashkuara kanë mbështetur misionin e KFOR si një shtyllë kryesore stabiliteti në rajon. Whitaker bëri të ditur se gjatë vizitës zhvilloi një takim të rëndësishëm me komandantin e KFOR-it, Ozkan Ulutas, ku u diskutua për zhvillimet e sigurisë në Ballkanin Perëndimor dhe për rolin e vazhdueshëm të aleancës. Ai theksoi se SHBA mbetet partneri më i fuqishëm i Kosovës, duke kontribuar drejtpërdrejt në rritjen e kapaciteteve të saj për vetëmbrojtje, ndërkohë që u bëri thirrje edhe aleatëve të tjerë që të marrin më shumë përgjegjësi për sigurinë evropiane. Kosova po e forcon gjithnjë e më shumë rolin e saj si kontribuese në sigurinë ndërkombëtare, duke përmendur angazhimin në mekanizma paqeruajtës dhe planin për të kontribuar me personel në misionin ndërkombëtar për stabilizim në Gaza. Whitaker gjithashtu vlerësoi përkushtimin e Kosovës për të avancuar sektorin e mbrojtjes, përfshirë sigurimin e pajisjeve mbrojtëse nga SHBA dhe zhvillimin e industrisë vendore të mbrojtjes, duke theksuar se partneritete më të forta sjellin një të ardhme më të sigurt për rajonin.
