Vizita e kryeministrit, Edi Rama, në Greqi, është një “vaki” më shumë në mesin e të papriturave dhe befasive të tij

Kryeministri i Shqipërisë, Edi Rama, vizitoi emigrantët shqiptarë në Greqi, pa e paralajmëruar apo pa kërkuar leje nga qeveria greke, madje pikërisht në njëvjetorin e arrestimit të vjedhësit të votave, në zgjedhjet lokal të  Shqipërisë, Fredi Belerit, në Himarë, me ç rast, për arrestimin e tij,  kishte reaguar shumë ashpër shteti grek. Edi Rama është trim, politikan i rryer, diplomat i zoti, në rast nevoje, pragmatist  por edhe nacionalist, demokrat, por edhe autokrat. Është treguar  trim në vepër, gjatë vizitës në Beograd,  kur e tha me gojën plot, para Vuçiqit e krejt Serbisë,  se Kosova është shtet i pavarur dhe Beogradi zyrtar  duhet ta njohë atë.

U tregua trim mbi trimat kur në Selinë e OKB-së, foli dhe protestoi për shkak të krijimit të Gjykatës Speciale kundër UÇK-së, mbajtjes në arrest të ish-kryetarit të Kosovës, Hashim Thaçi e të arrestuarve të tjerë nga kjo Gjykatë, duke i mbrojtur  ata me fakte e argumente edhe në institucionet  kryesore të Evropës.

Mbi të gjitha, Edi Rama  është politikani, që më së miri përfaqëson Shqipërinë dhe shqiptarët, botën e tyre komplekse, heterogjene,  po kurrë unike e kompakte.

Edi Rama ka merita të pakontestueshme në historinë më të re të kombit shqiptar në përgjithësi.

Ai është i çiltër, serioz dhe shumë i sinqertë kur e do nevoja, por di të jetë edhe arrogant e i papërmbajtur, sulmues dhe i çakërdisur, sidomos   kur  gjendet para gazetarëve dhe opinionistëve, përfaqësues të klaneve  mafioze,  mediatike.

Ai befasoi politikën greke me vizitën e praninë e tij në Athinë, në mesin e dhjetëra mijëra emigrantëve shqiptarë. Foli për pozitën e emigrantëve shqiptarë, po nuk përmendi asnjë fjalë për arvanitasit, shqiptarë autoktonë Greqisë, themeluesit e Shtetit grek qysh në vitin 1821. Foli për Bubulinën shqiptare, por jo për Parlamentin e parë grek ku gjuha e komunikimit ishte shqipja arvanitase.  Nuk u zgjerua në çështjen çame nga ana historike, por foli për “ligjin e luftës”  të cilin njëanshëm e kishte shpallur Monarkia greke që nga viti 1945, duke e konsideruar  absurd i llojit të vet.

Pavarësisht publicitetit që iu dhanë  kësaj vizite mediet greke e shumë të tjera, mediet shqiptare, përveç informatave, skematike nuk komentuan qëndrimin burrëror të Edi Ramës, në Greqi ndërsa opozita e kapardisur e zalisur dhe e batërdisur në Shqipëri i quajti dështim, vizitën për sikut thuhet mos-pjesëmarrje të mjaftueshme të emigrantëve shqiptarë.   Duke folur për këtë vizitë, kryetari i Partisë Drejtësi Integrim dhe Unitet, Shpëtim Idrizi, ka thënë se takimi i kreut të qeverisë të Shqipërisë, Edi Rama në Greqi, ka krijuar zhurmë në shtetin grek. Ai ka thënë se tashmë Shqipëria ka një peshë më të “rëndë” në rajon. Unë e pashë si një takim ku ndo doja të nënvizojë që është fakt që çdokush që ka përfaqësuar Shqipërinë jemi treguar të përulur, pa dinjitete do thosha. Madje në kushtet e servilizmit me Greqinë. Emigrantët u ndjenë të vlerësuar. Rama aty tha se ne jemi popuj miq por shtetet kanë interesa. Tha ca fakte të njohura historike, kam parasysh për çështjen çame, ligjit të luftës dhe pensioneve. Edhe konteksti do tregojë faktin se Shqipëria nuk është më ajo e mëparshme. Shqipëria ka një peshë tjetër në rajon dhe këtë duhet ta pranojmë. Rama donte të theksonte që të trajtohemi me dinjitete dhe respekt. Gjatë gjithë kohës kemi qenë të intimiduar. Historia ka treguar se jemi në kriza ciklike”, ka thënë kryetari i Partisë Drejtësi Integrim dhe Unitet, Shpëtim Idrizi. ( RKL)

Kontrolloni gjithashtu

Skënderbeu në Krujë

Ahmet Qeriqi: Gjergj Kastrioti-Skënderbeu diga e fortë kombëtare për t’i mbrojtur shqiptarët nga Lindja e nga Perëndimi

Evropa kërkon nga ne që Gjergj Kastriotit, t’ ia heqim Skënderbeun, ndërsa Azia kërkon që …