Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në ish-Burgun e Prishtinës, i njohur si “Burgu i Idealit”, është hapur ekspozita kolektive me titull “Arkeologjia e një portreti”; një iniciativë kolektive që përkohësisht e shndërron muzeun e burgut në një hapësirë takimi ndërmjet brezave. Artistja nga Shtimja, Emine Jetishi, përmes artit sjell në vëmendje kujtesën e ish-të burgosurit politikë profesor AHmet Qeriqit.
Ekspozita, e titulluar “8 vite të mbyllura, një kujtesë që nuk u mbyll kurrë”, i kushtohet figurës së Prof. Ahmet Qeriqit, ish-të burgosurit politik dhe ish-drejtorit të Radio Kosova e Lirë.
Në qendër të ekspozitës është portreti i Ahmet Qeriqit, të cilin artistja e ka trajtuar përmes dy fotografive të tij, të shndërruara në një interpretim artistik.
Pjesë e ekspozitës janë edhe pesë fotografi që paraqesin burgjet ku Ahmet Qeriqi ka vuajtur dënimin, ndërsa përmes tetë fletëve të shkruara, artistja ka përcjellë nga një fjali që personifikon përvojën e tij të burgimit dhe kujtesën që ka lënë ajo periudhë.
Përmes kësaj qasjeje, Emine Jetishi ka synuar të ndërthurë portretin me historinë personale dhe kujtesën kolektive, duke e kthyer hapësirën e dikurshme të burgimit në një vend reflektimi për të kaluarën.
Titulli “8 vite të mbyllura, një kujtesë që nuk u mbyll kurrë” i referohet viteve të burgimit të Ahmet Qeriqit, por njëkohësisht përcjell idenë se përvojat e atyre që u burgosën për bindjet dhe veprimtarinë e tyre politike nuk përfundojnë me daljen nga burgu.
Ekspozita e ekspozita kolektive me titull “Arkeologjia e një portreti”, do të qëndrojë e hapur për publikun deri më 4 shtator 2026.
