OVL-UÇK: Ata që drejtojnë plumbat kundër luftëtarëve të lirisë kanë vrarë vetë lirinë e Kosovës

Organizata e Veteranëve të Luftës së UÇK-së reagoi ashpër në lidhje me vrasjen e më pastaj djegien e luftëtarit të orëve të para të luftës së UÇK-së, Qerim Kelmendi. “Vrasja e bashkëluftëtarit tonë është një lajm shumë i dhimbshëm për ne. Kërkojmë nga organet e drejtësisë, që sa më shpejt ta zbulojnë këtë krim dhe përgjegjësit të marrin dënimin e merituar”, thuhet në reagimin e OVL UÇK-së. Sipas tyre, kur vriten luftëtarët e lirë në kohë paqe e në mënyrë makabre, vritet liria. Në lidhje më këtë vrasje makabre ka reaguar edhe dega e kësaj organizate në Deçan e cila dënon ashpër atentatin kundër bashkëluftetarit të tyre Qerim Kelmendi. “Ata që drejtojnë plumbat kundër luftëtarëve, i kanë drejtuar ato kundër vet lirisë, të cilën e fituam me aq shumë mund e sakrificë. Qerim Kelmendi ishte luftëtar i orëve të para të UÇK-së. Vrasjen e tij makabre, e kemi përjetuar rëndë, andaj ndajmë dhembjen me familjarët, bashkëveprimtarët e bashkëluftetarët.Bëjmë thirrje te organet e rendit dhe drejtësisë, që sa më parë ta zbardhin rastin”, thuhet në reagim.