Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Qytetarët e Bosnjë dhe Hercegovinës, mund të udhëtojnë drejt Kosovës vetëm me letërnjoftime, falë një vendimi të njëanshëm nga ana e Prishtinës zyrtare. Lëvizja e lirë e shtetasve të Bosnjë dhe Hercegovinës drejt Kosovës vjen pasi masa u mundësua nga qeveria më 14 tetor 2024, në kuadër të një marrëveshjeje si pjesë e Procesit të Berlinit. Marrëveshja për lëvizje me letërnjoftime ndërmjet vendeve të Ballkanit Perëndimor, krahas marrëveshjeve të tjera, u nënshkrua nga liderët e gjashtë vendeve të Ballkanit Perëndimor gjatë një takimi të këtij procesi në vitin 2022. Parlamenti i Kosovës e ratifikoi marrëveshjen më 23 shkurt të vitit 2023, por një gjë e tillë nuk është realizuar ende nga autoritetet në Bosnjë, ndërsa Prishtina akuzon entitetin serb të këtij vendi për bllokimin e marrëveshjes. Gjatë njoftimit të vendimit të njëanshëm në tetor të vitit të kaluar, kryeministri i Kosovës, Albin Kurti, tha se Republika Serbe po refuzon ratifikimin e marrëveshjes për lëvizje të lirë me letërnjoftime, ndërsa Kosova ka qenë e para në rajon që e ka ratifikuar këtë marrëveshje në parlament.
