Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-deputetja në Parlamentin e Kroacisë, Ermina Lekaj-Prljaskaj, në një intervistë për KosovaPress, e vlerësoi këtë nismë si strategjike, sidomos në kontekstin aktual gjeopolitik. Ajo theksoi se Kroacia si vend anëtar i NATO-s mund të luajë rol të rëndësishëm në përgatitjen e ushtrisë së Kosovës dhe në rrugën e saj drejt Partneritetit për Paqe. Kosova, Shqipëria dhe Kroacia pritet të konkretizojnë së shpejti një marrëveshje të rëndësishme në fushën e mbrojtjes, që synon të rrisë ndërveprueshmërinë mes ushtrive të tri shteteve. Deklarata për bashkëpunim u nënshkrua më 18 mars në Tiranë, ndërsa marrëveshja përfshin stërvitje të përbashkëta ushtarake dhe blerje të përbashkëta armatimi. Prljaskaj kritikoi ashpër reagimet e Beogradit, i cili e cilësoi marrëveshjen si “provokim”, duke e akuzuar Serbinë për nxitje të konflikteve rajonale dhe lidhje të ngushta me Rusinë. Nga ana tjetër, ministri në detyrë i Mbrojtjes, Ejup Maqedonci, ka thënë se marrëveshja nuk është kërcënim për askënd, por një mesazh për ata që synojnë destabilizimin e rajonit. Prljaskaj theksoi nevojën që Kosova të formojë sa më shpejt institucionet e reja, pasi vazhdimi i krizës politike po rrezikon projekte të rëndësishme për sigurinë kombëtare, në një kohë me zhvillime të paparashikueshme në rajon.
