Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Nuk kam pasur dëshirë të merrem aspak me këtë emër të përveçëm dhe e kam kursyer për afërsisht 4 vite të qeverisjes së tij, të cilit fatkeqësisht para katër vitesh ia kam besuar qeverisjen e Shtimes me votën time si qytetar. Sot pendohem për mundësinë që ia kam dhënë dhe këtë duhet ta pranoj publikisht. Por unë udhëhiqem nga sentenca: “Më mirë me qenë i tradhtuar se sa tradhtar.”
Sot, shtyhem të flas publikisht edhe më i vendosur se asnjëherë më parë. Nuk mund të pranoj me asnjë çmim tendencën për shpëlarje të Qemajl Aliut përpara opinionit, përmes uzurpimit të mikrofonit në seancën e Kuvendit Komunal në Shtime më dt. 25.08.2025, ku tentoi të etiketojë rëndë veprimtarin e njohur z. Ruzhdi Jashari, të cilit përmes spikerit të tij Adnan Ademaj ia mohuan të drejtën për të dhënë argumentet e tij.
Por si qëndron e vërteta e implikimit drastik të Qemajl Aliu në ndërhyrjen flagrante të këtij komisioni? Ja, do ta sqaroj tërë skemën të cilën e kishte ideuar Qemajl Aliu, por për fatin e mirë nuk i shkrepi me Ruzhdi Jasharin.
Qemajl Aliu, i cili betohej në nderin dhe dinjitetin e tij në seancën e Kuvendit Komunal në Shtime më dt. 25.08.2025, se nuk kishte asnjë implikim në këtë proces, më dt. 16 mars 2025 – vetëm dy ditë para takimit të Komisionit për Shqyrtimin e Kërkesave dhe Emërtimin e Objekteve Publike (i cili pritej të mbahej më dt. 18 mars 2025) – e thërret në telefon Ruzhdi Jasharin, duke i thënë se do ta takojë dhe se tek zyra e LVV-së në Shtime e pret Besnik Seferi.
Të tre së bashku shkuan në Koshare, në restorantin “Primavera”. Qemajl Aliu i kërkon kryesuesit të komisionit që t’i propozojë secilin objekt me emrat që ai ia kishte listuar në këtë takim. Shtëpia e Kulturës në Shtime – me theks të veçantë – i kërkon të emërtohet me emrin e regjisorit të ndjerë Fahri Hysaj, me arsyetimin se ishte edhe premtim i tij për familjen dhe të tjerë.
Pra, Qemajl Aliu mund të pohojë se këto janë fabrikime, por e vërteta qëndron se së bashku me Besnik Seferin kanë pritur z. Jasharin, kanë shkuar në restorant “Primavera” në Koshare dhe gjatë bisedës ka thënë se “Unë jam kryetari i Shtimes dhe unë vendos kështu.” Pas reagimit të Ruzhdi Jasharit: “Atëherë bëhu ti edhe kryetar komisioni dhe vendos pra këta emra,” – Qemajl Aliu ia kthen se: “Nëse nuk ndodh kjo, unë nuk i procedoj në kuvend.” Në përfundim të takimit i kërkon të shkojë edhe në zyrën e tij, gjë që z. Jashari nuk e ka pranuar.
Pra, nëse Qemajl Aliu pretendon se këto nuk qëndrojnë, është i lirë që të bëjë padi për shpifje. Por edhe unë kërkoj që, për këtë ndërhyrje flagrante që ka bërë Qemajl Aliu nga pozita e kryetarit të komunës, të thirret kryesuesi i komisionit së bashku me një anëtar komisioni – Besnik Seferi, asamblist i komunës së Shtimes – për të propozuar emërtimin e objekteve publike me rekomandimet e tij dhe me emra të përveçëm për secilin institucion, kërkoj nga Prokuroria e Republikës së Kosovës të angazhohet dhe ta hetojë këtë rast, sepse Qemajl Aliu nuk mund dhe nuk do të ketë shansin të shtrembërojë historinë e kësaj treve me asnjë çmim.
Puritanizmi i Qemajl Aliut në mbledhjen e Kuvendit të Komunës së Shtimes më dt. 25.08.2025 dhe i asamblistit të tij që betoheshin në nder e dinjitet, rezultoi me thirrje dhe presion paraprak më dt. 16 mars 2025. Për këtë është dëshmitar z. Ruzhdi Jashari, thirrjet telefonike dhe vetë takimi i dt. 16 mars 2025, i cili në fakt rezultoi me pengimin e komisionit nga Qemajl Aliu, duke ndaluar tre anëtarët e komisionit dhe duke bërë që të dështonte ky komision, meqë Qemajl Aliu kishte kuptuar që fryma e anëtarëve të komisionit ishte që Shtëpia e Kulturës të emërtohej me emrin e veprimtarit Ahmet Qeriqi.
Sot vendosa ta bëj këtë reagim në shenjë revolte, sepse Qemajl Aliu, përkundër që goditi pabesisht dhe aq pandershmërisht z. Ruzhdi Jasharin në mbledhjen e dt. 26.08.2025 duke mos i dhënë hapësirë as të replikonte, për më tepër ka vendosur t’i bëjë një gjyq publik Ruzhdi Jasharit sot, më dt. 27.08.2025, në ora 11:00 në zyrën e tij.
Përmes shefes së kabinetit të tij, znj. Anita Kurti, na ka ftuar që të takohemi në një takim të përbashkët për të diskutuar me familjarët e personaliteteve që kanë propozuar për emërtimin e objekteve publike në komunën e Shtimes. Sipas kësaj ftese, në takim do të diskutohet dhe sqarohet puna e komisionit që nga fillimi deri tani.
Por në këtë ftesë, që Qemajl Aliu dëshiron ta shpërlajë veten e tij në një moçal të cilin e ka kurdisur vetë, nuk tregon që nuk e ka ftuar vetë kryesuesin e komisionit. Aty do të përpiqet të shfajësojë veten e tij dhe në të njëjtën kohë të linçojë figurën e z. Ruzhdi Jasharit, i cili e demantoi këtë proces nga pozita e kryesuesit të komisionit.
Si përfundim:
Qemajl Aliu, koha të shpërfaqi dhe ti nuk mundesh t’i bësh bashkë në një tryezë të gjithë, përpos atyre që mendojnë dhe rezonojnë si ti.
