Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ambasadori në largim i Gjermanisë në Kosovë, Jorn Rohde, ka bërë thirrje që pas zgjedhjeve të 9 shkurtit të formohet sa më shpejt Qeveria e re, duke theksuar rëndësinë e saj për avancimin e Kosovës drejt integrimeve evropiane. Rohde paralajmëroi se vonesat në krijimin e institucioneve mund të sjellin pasoja serioze, duke përfshirë edhe procesin e anëtarësimit në Këshillin e Evropës dhe fonde të ndryshme nga Bashkimi Evropian. Ai përmendi shembuj rajonalë, si Shqipëria dhe Mali i Zi, të cilat kanë përparuar me kapituj të rinj për anëtarësim në BE, duke paralajmëruar se Kosova mund të mbetet pas. “Gjermania është partner i fortë i Ballkanit Perëndimor. Procesi i Berlinit, liberalizimi i vizave dhe mbështetja për anëtarësim në Këshillin e Evropës tregojnë angazhimin tonë, por nëse nuk keni Qeveri, rrezikoni të humbisni autobusin,” tha Rohde, duke nënvizuar rëndësinë e funksionimit të plotë të institucioneve për integrimin europian. Ai gjithashtu rikujtoi përvojën e Serbisë, ku vonesat në reforma kanë penguar përparimin: “Nëse nuk i kryeni detyrat e shtëpisë, mund të ketë pasoja. Dhe nëse nuk keni Qeveri, nuk mund të jeni partnerë të plotë – as bilateralë, e as për BE-në.” Mungesa e një Kuvendi aktiv ndikon direkt në shfrytëzimin e fondeve evropiane: Thjesht, nëse paratë nuk vijnë, është sepse Parlamenti nuk punon. Ka rrezik që këto fonde të humbasin nëse situata vazhdon gjatë.
