Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Instituti “Robert Lansing” për Studime të Rreziqeve Globale dhe Demokracisë, me seli në Delaware të Shteteve të Bashkuara, ka publikuar një artikull kritik ndaj qeverisë së Kosovës për qasjen e saj ndaj partnerit strategjik amerikan. Në artikull thuhet se kryeministri Albin Kurti po vepron sikur Shtetet e Bashkuara t’i kenë borxh Kosovës, duke treguar një sjellje të çrregullt në raport me diplomacinë amerikane. Pezullimi i dialogut strategjik SHBA–Kosovë përbën “një nga prapakthimet më të rënda diplomatike që nga paslufta”, duke dëmtuar rëndë pozitën ndërkombëtare të vendit. Ai dërgon sinjale alarmuese për shtetet që ende nuk e kanë njohur pavarësinë e Kosovës dhe mund të inkurajojë fushatën e Serbisë për t’i penguar njohjet e reja”, thuhet ndër të tjera në artikull. Instituti vlerëson se raportet e Kosovës me Shtetet e Bashkuara kanë stagnuar për shkak të, siç thuhet, “mungesës së angazhimit aktiv në politikën e jashtme” dhe perceptimit se qeveria në Prishtinë ka të drejtë absolute në çdo qëndrim. Instituti “Robert Lansing” paralajmëron se izolimi diplomatik i Kosovës po bëhet gjithnjë e më i dukshëm dhe se dëmtimi i marrëdhënieve me SHBA-në rrezikon seriozisht progresin në shtetndërtim, demokraci dhe siguri. “Pavarësia pa diplomaci është izolim, dhe e ardhmja e mirëqenies së Kosovës varet nga rindërtimi i partneritetit me Shtetet e Bashkuara”, përfundon artikulli i këtij instituti amerikan.
