Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Zyra e Kryeministrit të Kosovës konfirmoi shkarkimin e zëvendësministrit të Zhvillimit Rajonal, Elldin Uglari, anëtar i SDU-së së udhëhequr nga Duda Balje. Vendimi është marrë nga kryeministri në detyrë, Albin Kurti. Në njoftimin e ZKM-së shkarkimi paraqitet si procedurë e zakonshme, por reagimi politik nuk vonoi. Kryetarja e SDU-së, Duda Balje, e cilësoi vendimin si vazhdim të presionit dhe ndëshkimit ndaj partisë së saj. “Hakmarrja nuk ka nisur, veç ka vazhduar,” deklaroi Balje, në një mesazh të shkurtër e të drejtpërdrejtë. Ky është zyrtari i dytë i larguar nga radhët e SDU-së brenda pak kohe, ndërsa Balje ka paralajmëruar vazhdimisht se nuk do të votojë qeverinë Kurti pa u përmbushur kërkesa për formimin e një komune boshnjake. Lëvizja e fundit e Qeverisë shihet si shenjë e tensioneve të thelluara në prag të vendimeve politike për koalicionet dhe mbajtjen e shumicës parlamentare. Shkarkimi i Uglarit pritet të shtojë edhe më tepër përplasjet ndërmjet Kurtit dhe partnerëve potencialë, në një kohë kur skena politike në Kosovë mbetet në ngërç dhe e pasigurt për hapat e ardhshëm drejt konstituimit të institucioneve.
