Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ambasadori i Palestinës në Shqipëri, Sami Mhanna, ka deklaruar se arsyeja kryesore pse Palestina nuk e njeh Kosovën lidhet me vendimin e Prishtinës për të hapur Ambasadën e saj në Jerusalem. Në një intervistë për Top Channel, ai tha se ky veprim konsiderohet nga qeveria palestineze si shkelje e të drejtës ndërkombëtare, pasi Jerusalemi vlerësohet ende si territor i pushtuar. “Sa i përket njohjes së Kosovës, nuk i dihet kurrë. Palestinezët, si popull dhe si qeveri, nuk kanë asgjë kundër Kosovës apo popullit të saj,” u shpreh Mhanna, duke theksuar se qëndrimi aktual është i lidhur vetëm me çështjen e ambasadës. Ai rikujtoi se këtë argument e ka shpjeguar edhe në takimet me autoritetet shqiptare. Sipas tij, edhe presidenti Bajram Begaj ka kërkuar sqarime mbi mosnjohjen e Kosovës, dhe përgjigja ka qenë e njëjtë: vendimi për hapjen e ambasadës në Jerusalem është arsyeja kryesore. Mhanna gjithashtu hodhi poshtë raportimet se presidenti palestinez Mahmoud Abbas e kishte lidhur mosnjohjen e Kosovës me marrëdhëniet me Serbinë. “Ato raporte kanë qenë të gabuara. Çështja e Kosovës ka qenë gjithmonë e lidhur me të drejtën ndërkombëtare,” tha ambasadori. Ai theksoi se personalisht ka marrëdhënie të mira me ambasadorin e Kosovës në Tiranë dhe se vendi i tij nuk ka qëndrim armiqësor ndaj qytetarëve të Kosovës. Ambasadori shtoi se e ka kaluar territorin e Kosovës gjatë udhëtimit drejt Shqipërisë dhe shprehu interesin për ta vizituar zyrtarisht Prishtinën në të ardhmen e afërt. Sipas tij, pavarësisht debateve të brendshme, për qeverinë palestineze hapja e ambasadës në Jerusalem mbetet faktori vendimtar që ka përcaktuar qëndrimin aktual ndaj njohjes së shtetit të Kosovës.
