Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Pas pesë vitesh procesesh të gjata, të mbyllura e shpesh të paqarta për publikun, gjykimi ndaj ish-krerëve të Ushtrisë Çlirimtare të Kosovës po hyn në fazën e tij finale. Pas caktimit të fjalëve përfundimtare në shkurt 2026, muaji prill – ose më së largu fillimi i majit – pritet të shënojë shpalljen e aktgjykimit të shkallës së parë në rastin Thaçi, Veseli, Krasniqi dhe Selimi. Monitorues të procesit e cilësojnë këtë gjykim si “maratonik”, me transparencë të cënuar, pasi rreth gjysma e dëshmitarëve të ZPS-së u dëgjuan në seanca të mbyllura ose të redaktuara. Sipas Fondit për të Drejtën Humanitare, pavarësisht sfidave, procedura është afruar drejt epilogut, ndërsa presioni publik për një verdikt të qartë po rritet. Ndërkohë, dëshmitarët e mbrojtjes – mes tyre ish-zyrtarë të lartë amerikanë si James Rubin dhe gjenerali Wesley Clark – kanë goditur rëndë narrativën e Prokurorisë, duke e përshkruar UÇK-në si strukturë të paorganizuar komanduese dhe duke mohuar se Hashim Thaçi ka pasur rol komandues ushtarak. Analistët vlerësojnë se këto dëshmi kanë ndikuar drejtpërdrejt në besueshmërinë e akuzës, të cilën e cilësojnë “të ndërtuar dobët dhe të përfaqësuar dobët”. Megjithë kritikat për mungesë transparence dhe qasje agresive të Prokurorisë, mbetet gjykata ajo që do të japë fjalën e fundit. Vendimi, që pritet të shpallet këtë pranverë, konsiderohet si më vendimtari në historinë e gjykimeve ndaj ish-pjesëtarëve të UÇK-së — një aktgjykim që mund të ndikojë thellë në narrativën ndërkombëtare për luftën në Kosovë. Në Hagë, katër ish-udhëheqësit e UÇK-së mbeten të paraburgosur nga viti 2020 dhe të deklaruar të pafajshëm mbi të gjitha akuzat për krime kundër njerëzimit dhe krime lufte.
