Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Analisti dhe profesori amerikan Edward Joseph e sheh anëtarësimin e Kosovës në NATO si një nga rrugët kryesore për të zhbllokuar tensionet me Serbinë dhe për të hapur horizonte të reja për vendin. Në një intervistë për “Civil Today”, Joseph tha se nëse Shtetet e Bashkuara, nën udhëheqjen e presidentit Trump, do t’i ofronin Kosovës një rrugë të qartë drejt NATO-s me kusht zbatimin e Asociacionit të Komunave me Shumicë Serbe, çdo kryeministër i Kosovës do të pranojë një iniciativë të tillë. “Presidenti Trump mund t’i ftojë udhëheqësit e Kosovës dhe Serbisë në Shtëpinë e Bardhë për të nënshkruar një marrëveshje që angazhon të dyja palët drejt objektivit strategjik të anëtarësimit në NATO,” tha Joseph. Themelimi i Asociacionit do t’i siguronte Serbisë një koncesion të prekshëm, pa detyrimin për njohje të menjëhershme të Kosovës, duke ulur tensionet dhe duke krijuar një kuadër stabil për bashkëpunim strategjik. Njohja reciproke do të bëhej e pashmangshme kur të dy vendet të jenë anëtarë të NATO-s, duke garantuar një dinamikë më të qëndrueshme dhe të favorizuar për Kosovën. Kjo strategji do të ndikonte edhe në njohjen e Kosovës nga vendet e BE-së, duke filluar me Greqinë dhe më pas duke zgjeruar ndikimin mbi shtetet e tjera që ende nuk e kanë njohur vendin. Ai nënvizon rëndësinë strategjike të anëtarësimit në NATO mbi atë të anëtarësimit në OKB, duke u referuar tek përvoja e Ukrainës. Një rrugë e qartë drejt NATO-s do të ndryshonte rrënjësisht dinamikën rajonale: Serbia do të ngecë në vend, ndërsa Mali i Zi do të lëvizë drejt BE-së dhe Kosova drejt NATO-s. Strategjia e Serbisë për pengesa diplomatike dhe mbështetje nga Rusia e Kina do të bëhet e vështirë për t’u mbajtur,” përfundoi Joseph.
