Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Organizata e Veteranëve të Luftës së UÇK’së ka reaguar ashpër për vdekjen e babait të Salih Mustafës, Jahja Mustafa, duke shprehur shqetësimin dhe indinjatën e thellë për refuzimin e Gjykatës Speciale në Hagë që t’i mundësojë Mustafës një vizitë humanitare pranë babait të tij në momentet e fundit të jetës. “OVL UÇK shpreh indinjatën dhe shqetësimin e thellë për refuzimin e Dhomave të Specializuara në Hagë që t’i mundësojnë Salih Mustafës një vizitë humanitare pranë babait të tij, i cili tashmë ka ndërruar jetë, pa e parë dhe pa i dhënë lamtumirën e fundit të birit,” theksohet në reagim. Sipas OVL-së, vendimi i Speciales përbën shkelje të rëndë të parimeve themelore të të drejtave të njeriut: “Ky vendim i pashpjegueshëm dhe johuman përbën një shkelje të rëndë të parimeve themelore të të drejtave të njeriut dhe të çdo standardi minimal të humanizmit. Salih Mustafa është i dënuar me aktgjykim të formës së prerë dhe nuk ka ekzistuar asnjë rrezik për ndikim në dëshmitarë apo në ndonjë proces gjyqësor. Refuzimi i një kërkese të tillë humanitare nuk ka as bazë ligjore dhe as morale. Mohimi i së drejtës për t’i qëndruar pranë prindit në momentet e fundit të jetës dhe për t’i dhënë lamtumirën e fundit është një akt që tejkalon çdo kufi të drejtësisë dhe e zhvesh procesin nga çdo ndjenjë njerëzore. Drejtësia pa humanizëm nuk është drejtësi, por padrejtësi e institucionalizuar.” OVL e UÇK-së i shpreh gjithashtu ngushëllime të sinqerta familjes Mustafa, bashkëluftëtarëve dhe të gjithë atyre që e njohën Jahja Mustafën, duke theksuar humbjen e madhe morale dhe emocionale që solli kjo situatë. Ky reagim nënvizon mungesën e humanizmit dhe sensibilitetit nga Gjykata Speciale dhe ngre pyetje serioze mbi respektimin e të drejtave themelore të të dënuarve dhe familjeve të tyre.
