Zymer Kodra: “Libri që s’u shkrua kurrë” promovohet sot në orën 17:00- Shtëpia e Kultures – Shtime

Ka histori që shkruhen me bojë, e ka të tjera që lihen në heshtje, si plagët që shërohen nga brenda, pa zë. Ky libër është rrëfimi i një udhëtimi që lëviz mes kujtimit dhe harresës, mes dhimbjes dhe dinjitetit, mes fjalës së thënë dhe asaj që mbeti pezull në ajër. “Libri që s’u shkrua kurrë” nuk është një trillim. Nuk është as vetëm një dëshmi. Është një përpjekje për të kapur thelbin e një kohe kur njerëzit sakrifikonin gjithçka për një ëndërr – për lirinë. Ai ngërthen brenda vetes rrëfime të luftës, por më shumë se kaq, është rrëfim i njeriut që mbetet pas: i atij që kërkon kuptim në dhimbje, që përpiqet të mbledhë copëzat e së shkuarës për të ruajtur të vërtetën. Ky libër është një homazh për ata që folën pak, por bënë shumë. Për ata që jetuan thjesht, por ranë madhërisht. Për Ilirin dhe të gjithë ata si ai dhe ajo që nuk patën kohë ta shkruajnë librin e tyre, sepse po e jetonin me gjak. Në dorën time nuk kam vetëm lapsin, por edhe një amanet të pa shkruar. Dhe këtë amanet e ndaj me ty, lexues i nderuar, që tani bëhesh pjesë e kësaj historie. Sepse disa libra nuk mbarojnë kurrë. Ato vazhdojnë në kujtesën tonë, në ndërgjegjen tonë, dhe më së shumti – në heshtjen tonë. “Kujtimi është ajo që nuk vdes kur vdes njeriu.” Autor: Zymer Kodra