Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komandanti i Forcës së Sigurisë së Kosovës, Gjenerallejtënant Bashkim Jashari, priti në takim zyrtar Drejtorin e Ushtrisë së Gardave Kombëtare të Shteteve të Bashkuara të Amerikës, Gjenerallejtënant Jonathan M. Stubbs, i shoqëruar nga Gjeneral Major Levon E. Cumpton dhe delegacioni përkatës. Gjatë takimit u diskutua për bashkëpunimin e shkëlqyer ndërmjet Forcës së Sigurisë së Kosovës dhe Byrosë së Gardës Kombëtare të SHBA-së, me theks të veçantë partneritetin e suksesshëm me Gardën Kombëtare të Ajovës. Palët vlerësuan lartë mbështetjen e vazhdueshme amerikane në ngritjen e kapaciteteve profesionale të FSK-së, zhvillimin e trajnimeve të përbashkëta si dhe avancimin e ndërveprueshmërisë me forcat partnere. Gjenerallejtënant Jashari shprehu mirënjohjen e tij për mbështetjen e pandërprerë të Shteteve të Bashkuara të Amerikës, duke e cilësuar këtë partneritet si thelbësor për zhvillimin, modernizimin dhe profesionalizimin e Forcës së Sigurisë së Kosovës. Gjatë takimit, palët u pajtuan se Programi i Partneritetit të Përbashkët ndërmjet Gardës Kombëtare të Ajovës dhe FSK-së përbën një shembull të suksesshëm bashkëpunimi, me rezultate konkrete në aktivitete dhe fusha të ndryshme.
