Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kosova vazhdon të mbetet shteti me të ardhurat më të ulëta për frymë në Europë edhe për vitin 2025, sipas të dhënave më të fundit të publikuara nga Fondi Monetar Ndërkombëtar (FMN), duke nxjerrë në pah dobësitë strukturore të ekonomisë dhe ngecjen në standardin e jetesës krahasuar me vendet e rajonit. Me vetëm 8,033 dollarë për frymë, Kosova renditet në fund të listës europiane, pavarësisht rritjes nominale ekonomike të raportuar në vitet e fundit. Të dhënat tregojnë se kjo rritje nuk është përkthyer në mirëqenie reale për qytetarët dhe nuk ka mjaftuar për të ngushtuar diferencën me fqinjët. Në krahasim rajonal, Serbia kryeson me rreth 15.3 mijë dollarë për frymë, e ndjekur nga Mali i Zi me 14.9 mijë dollarë, ndërsa Maqedonia e Veriut dhe Bosnje-Hercegovina renditen gjithashtu mbi Kosovën. Edhe Shqipëria, megjithëse mbetet ndër vendet më të dobëta në Europë për këtë tregues, ka arritur rreth 11 mijë dollarë për frymë, dukshëm më lart se Kosova. Sipas këtij treguesi, Kosova renditet e 98-ta në botë, duke dëshmuar kufizim serioz të fuqisë blerëse dhe ekspozim të lartë ndaj kostos së jetesës dhe strukturës së dobët prodhuese.
