Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Unionet e studentëve të drejtësisë kanë bërë thirrje publike për mbështetje të gjerë nga mediat, organizatat e shoqërisë civile dhe aktivistët qytetarë, në funksion të një proteste që do të mbahet më 6 prill në Shkup.
Në reagimin e tyre, studentët shprehin mirënjohje për përkrahjen e deritanishme, duke theksuar se roli i mediave dhe i shoqërisë civile ka qenë kyç në ngritjen e kësaj çështjeje dhe në informimin e drejtë të opinionit publik.
Sipas tyre, problemi kryesor mbetet i pazgjidhur: pamundësia për të dhënë provimin e jurisprudencës në gjuhën shqipe, pavarësisht se kjo e drejtë garantohet me Kushtetutë dhe me ligj, por vazhdon të mos zbatohet në praktikë prej vitesh.
Për këtë arsye, është paralajmëruar protestë paqësore më 6 prill, duke filluar nga ora 12:30, me nisje nga Ura e Gurit në Shkup. Organizatorët bëjnë thirrje që kjo protestë të mbështetet gjerësisht si një përpjekje për të adresuar një padrejtësi të vazhdueshme ndaj studentëve shqiptarë të drejtësisë.
Në thirrje theksohet se angazhimi i mediave dhe i aktorëve të shoqërisë civile mbetet i pazëvendësueshëm si zë i së vërtetës dhe si faktor i rëndësishëm në nxitjen e ndryshimeve shoqërore.
Studentët u bëjnë apel të gjitha palëve që të kontribuojnë përmes raportimit të drejtë dhe të paanshëm, si dhe përmes pjesëmarrjes në protestën paqësore, në mënyrë që kjo çështje të marrë vëmendjen dhe zgjidhjen e merituar.
