Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputeti i PDK-së, Përparim Gruda, ka bërë të ditur se kjo parti do të abstenojë në votimin e Projektligjit për Verifikimin dhe Konfiskimin e Pasurisë së Pajustifikueshme, duke paralajmëruar se pa adresimin e vërejtjeve thelbësore, PDK nuk do ta mbështesë në leximin e dytë. Sipas tij, ligji ka probleme serioze juridike dhe procedurale, duke përfshirë faktin se është rrëzuar dy herë nga Gjykata Kushtetuese e Kosovës dhe ka marrë vërejtje nga Komisioni i Venecias. Ai theksoi gjithashtu mungesën e konsultimit publik, të cilin e cilësoi si standard të domosdoshëm për ligje që prekin të drejtat dhe liritë themelore të qytetarëve. Gruda ngriti shqetësime edhe për aspektet teknike dhe përmbajtësore të ligjit, përfshirë emërtimin e tij, duke argumentuar se titulli nuk përputhet me kompetencat reale të institucionit që krijohet. Sipas PDK-së, abstenimi i sotëm është një mundësi për përmirësimin e draftit mes dy leximeve, ndërsa paralajmërohet se pa adresimin e këtyre vërejtjeve, partia nuk do ta votojë ligjin në fazën përfundimtare. Debati rreth këtij projektligji po thellon përplasjet politike dhe juridike në Kuvend, duke reflektuar ndarjet e theksuara mbi mënyrën se si duhet trajtuar lufta kundër pasurisë së pajustifikueshme në Kosovë.
