Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kreu i Avokatit të Popullit, Naim Qelaj, ka mbajtur një konferencë për media ku ka prezantuar një raport preliminar mbi mbikëqyrjen e punës së gjykatës speciale në Hagë, pas shqetësimeve të ngritura për procesin gjyqësor dhe trajtimin e të paraburgosurve në Hagë. Qelaj tha se raporti është hartuar nga organizata britanike “Komiteti për të Drejtat e Njeriut i Dhomës së Avokatëve të Anglisë dhe Uellsit”, e cila është angazhuar si autoritet i pavarur për vlerësim, pasi institucionet në Hagë nuk kanë kthyer përgjigje ndaj kërkesave të autoriteteve kosovare. “Gjykata ka qëndruar e heshtur. Duke parë mungesën e transparencës, kemi angazhuar një autoritet të pavarur për vlerësim preliminar të shqetësimeve. Raporti është plotësisht i pavarur, pa asnjë ndërhyrje nga ne”, ka deklaruar Qelaj. Sipas tij, gjetjet e raportit ngritin shqetësime serioze për mënyrën e zbatimit të paraburgimit, duke përfshirë zgjatjen e tij për periudha të gjata pa alternativa reale për lirim të përkohshëm, si dhe kufizime në komunikimin me familjarët dhe ekipin mbrojtës. Raporti po ashtu trajton mungesën e transparencës në disa faza të procesit gjyqësor, duke hapur debat të ri mbi standardet e drejtësisë dhe të drejtave të njeriut në këtë mekanizëm ndërkombëtar. Qelaj theksoi se qëllimi i raportit është të ndriçojë çështjet e ngritura dhe të kontribuojë në rritjen e llogaridhënies dhe respektimit të standardeve ndërkombëtare të drejtësisë.
