Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kosova po përballet me rrezikun serioz të humbjes së qindra milionë eurove nga Bashkimi Europian, për shkak të bllokadës institucionale dhe mungesës së progresit në zbatimin e reformave të kërkuara nga Brukseli. Sipas të dhënave zyrtare, BE-ja ka alokuar rreth 882.6 milionë euro për Kosovën, por transferimi i këtyre mjeteve lidhet drejtpërdrejt me zbatimin e Agjendës së Reformave dhe funksionalizimin efektiv të institucioneve shtetërore. Komisioni Europian ka paralajmëruar se vonesat në proceset reformuese mund t’i kushtojnë shtrenjtë Kosovës. “Me përfundimin e periudhës së parë të tolerimit më 30 qershor të këtij viti për 13 hapa reformues, Kosova rrezikon të humbasë fonde nëse nuk shënon progres në zbatimin e Agjendës së Reformave”, thuhet në përgjigjen e Komisionit Europian. Brukseli ka theksuar se ratifikimi i marrëveshjeve dhe avancimi i reformave kërkojnë vendimmarrje të shpejtë politike, diçka që aktualisht po pamundësohet nga ngërçi institucional dhe mungesa e funksionalitetit të plotë të Kuvendit. Kjo situatë po shihet si alarm serioz për institucionet vendore, pasi fondet e parapara nga BE-ja konsiderohen jetike për zhvillimin ekonomik, investimet dhe përparimin e reformave në Kosovë.
