U mbajt mbledhja e II-të e Këshillit Komunal për Siguri në Bashkësi të Deçanit (KKSB) për vitin 2026.
Mbledhjen e hapi Kryetari i Komunës, z. Bashkim Ramosaj, i cili theksoi se gjendja e sigurisë në komunën e Deçanit vazhdon të jetë e qetë dhe stabile. Kryetari vlerësoi bashkëpunimin ndërinstitucional dhe bëri thirrje për angazhim, unitet dhe koordinim të vazhdueshëm ndërmjet institucioneve lokale dhe qytetarëve, me qëllim të ruajtjes së rendit, sigurisë dhe mirëqenies së përgjithshme në komunë.
Komandanti i Policisë në Deçan, z. Xhemë Muriqi, theksoi se situata e sigurisë në komunë mbetet e qetë dhe stabile, përkundër disa rasteve të aksidenteve të trafikut që kanë ndodhur gjatë kësaj periudhe, ku disa prej tyre kanë përfunduar edhe me pasoja fatale. Ai shtoi se Policia e Kosovës po vazhdon angazhimin maksimal në ofrimin e sigurisë dhe rendit publik për të gjithë qytetarët.
Drejtori për Shërbime Publike, z. Izet Zenuni, ngriti shqetësimin lidhur me mungesën e mbështetjes logjistike dhe pajisjeve për njësinë e zjarrfikësve në komunën e Deçanit. Ai theksoi se deri më tani nuk kanë pranuar ndihmë të mjaftueshme nga institucionet përgjegjëse, duke potencuar nevojën për investime dhe përkrahje më të madhe në këtë sektor, sidomos gjatë sezonës verore kur rreziku nga zjarret është më i lartë.
Ndërsa Kryetari i Bashkësisë Islame në Deçan, z. Naser Tolaj, propozoi organizimin e një tryeze të përbashkët me të gjitha institucionet relevante, me fokus vetëdijesimin e rinisë së komunës sonë për mbrojtjen e mjedisit, parandalimin e dukurive negative dhe luftimin e përdorimit të lëndëve narkotike. Ai theksoi rëndësinë e bashkëpunimit të institucioneve, familjes dhe shoqërisë në edukimin dhe mbështetjen e të rinjve.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
