Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Prishtinës, Përparim Rama, ka reaguar ashpër ndaj zyrtares së Lëvizjes Vetëvendosje, Dejona Mihajli, duke e akuzuar atë për shpifje dhe gjuhë fyese, ndërsa ka bërë të ditur se është duke përgatitur padi në organet e drejtësisë. Në një reagim publik, Rama ka deklaruar se nuk do të tërhiqet përballë, siç i quajti ai, kërcënimeve dhe shantazheve politike, duke theksuar se çështja do të trajtohet nga institucionet e drejtësisë. Ai akuzoi eksponentë të pushtetit për përdorimin e rrjeteve sociale dhe profileve të rreme për të sulmuar kundërshtarët politikë dhe për të nxitur përçarje në shoqëri. Rama ngriti shqetësime edhe për gjendjen e demokracisë në vend, duke paralajmëruar se Kosova po hyn në një fazë të rrezikshme të normalizimit të një mentaliteti që, sipas tij, synon heshtjen e zërave kritikë dhe kontrollin e institucioneve të pavarura. Në deklaratën e tij, ai kritikoi ashpër Lëvizjen Vetëvendosje dhe kryeministrin Albin Kurti, duke i akuzuar për përpjekje për të zhvlerësuar luftën çlirimtare, figurat e saj dhe familjet e dëshmorëve. Sipas Ramës, sulmet ndaj mediave, gazetarëve, analistëve dhe institucioneve të pavarura. Rama paralajmëroi se një përqendrim i tillë i pushtetit mund ta shtyjë vendin drejt autokracisë, duke bërë thirrje për reagim qytetar dhe mbrojtje të vlerave demokratike. “Është koha e fundit që secili ta kuptojë se po ecim drejt autokracisë. Dhe kjo nuk duhet t’i ndodhë këtij shteti”, ka deklaruar Rama në fund të reagimit të tij.
