Teuta Haxhiu: Kurti u rrit politikisht me kriza dhe po e çon vendin drejt një ngërçi të ri institucional

Deputetja e zgjedhur e AAK-së, Teuta Haxhiu, i ka bërë thirrje kryeministrit në detyrë, Albin Kurti, që të pranojë gjashtë propozimet e paraqitura nga AAK-ja për formimin e institucioneve të reja dhe tejkalimin e krizës politike në vend. Sipas Haxhiut, Aleanca për Ardhmërinë e Kosovës nuk po kërkon pjesëmarrje në pushtet apo poste institucionale, por një zgjidhje që do ta nxirrte vendin nga bllokada politike dhe ekonomike.  “Nuk jam duke parë ndonjë hap konkret. Nuk është në interes të vendit të shkojmë prapë në zgjedhje. Megjithatë, zoti Kurti, fatkeqësisht është rritur si subjekt politik në kriza dhe po frikësohem se prapë po dëshiron të shkojë në atë drejtim. Liderët duhet të ulen në mënyrë që të kemi një marrëveshje paraprake, përfshirë edhe emrin e presidentit të ri, sepse nuk është praktikë që vendi të udhëhiqet vetëm nga një subjekt politik”, ka deklaruar Haxhiu. Ajo ka theksuar se partia fituese ka përgjegjësinë për të nisur dialogun me subjektet e tjera politike, jo vetëm për formimin e qeverisë së re, por edhe për arritjen e një konsensusi rreth zgjedhjes së presidentit të ardhshëm të vendit.