Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-diplomati Sylë Ukshini ka vlerësuar se avancimi i Kosovës drejt anëtarësimit në Bashkimin Evropian vazhdon të varet nga progresi në dialogun me Serbinë dhe zbatimi i detyrimeve që burojnë nga Marrëveshja e Ohrit. Ukshini tha se, ndonëse kjo nuk theksohet gjithmonë publikisht nga Bashkimi Evropian, brenda bllokut evropian ekziston një qëndrim i qartë që e lidh procesin e integrimit me përparimin në dialog. Ai rikujtoi se Këshilli i Bashkimit Evropian, në prill të vitit 2024, ka përcaktuar se detyrimet që rrjedhin nga Marrëveshja e Ohrit janë pjesë e procesit të integrimit evropian, duke e bërë përparimin në dialog një kriter të rëndësishëm për avancimin e Kosovës drejt BE-së. Sipas Ukshinit, kjo krijon një lidhje të drejtpërdrejtë mes zbatimit të marrëveshjes dhe perspektivës evropiane të Kosovës, ndërsa theksoi se, edhe pse Marrëveshja e Ohrit nuk është nënshkruar, Bashkimi Evropian e konsideron atë detyruese në kuadër të procesit të integrimit. Ai shtoi se Serbia synon që dialogu të mos lidhet me procesin e integrimit evropian, ndërsa BE-ja ruan qasjen që dinamika e përmbushjes së marrëveshjes të ndikojë në ecurinë e integrimit të të dyja palëve.
