Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Vetëm disa orë pasi Lidhja Demokratike e Kosovës njoftoi se vendimi për mbështetjen e Bekim Sejdiut për president ishte marrë pa vota kundër, kreu i kësaj partie, Lumir Abdixhiku, ka bërë të ditur se gjashtë deputetë të LDK-së janë kundër marrëveshjes me Lëvizjen Vetëvendosje. Abdixhiku ka përmendur me emra Avdullah Hotin, Hykmete Bajramin, Janina Ymerin, Armend Zemajn, Arben Gashin dhe Kujtim Shalën, duke deklaruar se këta deputetë nuk e mbështesin dakordimin për zgjedhjen e Bekim Sejdiut në postin e presidentit të Kosovës. Zhvillimi paraqet një përplasje të dukshme brenda LDK-së, pasi më herët partia kishte komunikuar se vendimi për mbështetjen e kandidaturës ishte marrë në përputhje me procedurat e saj të brendshme dhe pa vota kundër. Sipas LDK-së, vendimi është në përputhje me mandatin e dhënë nga Kuvendi i partisë dhe synon ruajtjen e stabilitetit institucional dhe shmangien e një krize të re politike. Në arsyetimin zyrtar, LDK-ja ka theksuar se marrëveshja për presidentin nuk duhet parë vetëm si mbështetje për një kandidat, por si një hap për funksionimin normal të institucioneve dhe ruajtjen e rendit kushtetues. Partia ka vlerësuar se presidenti duhet të jetë një figurë me integritet, përgatitje profesionale dhe përvojë institucionale, e aftë të përfaqësojë unitetin e qytetarëve. Megjithatë, pas këtij qëndrimi zyrtar, kundërshtimi nga gjashtë deputetët tregon se brenda LDK-së nuk ka pajtueshmëri të plotë për kandidaturën e Bekim Sejdiut. I pari që doli publikisht kundër ishte ish-kryeministri dhe deputeti i LDK-së, Avdullah Hoti, duke e bërë edhe më të dukshme përplasjen brenda partisë në prag të procesit për zgjedhjen e presidentit.
