Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Mbetje mortore që mund t’u përkasin viktimave të luftës në Kosovë janë gjetur dhe zhvarrosur në lokacionin e njohur si “Varrezat e besimtarëve myslimanë”, brenda varrezave të qytetit të Mitrovicës së Veriut. Komisioni Qeveritar për Persona të Zhdukur ka njoftuar se gërmimet vlerësuese janë zhvilluar më 27 tetor 2026, si vazhdim i punimeve të nisura një javë më parë, më 20 tetor. Operacioni është realizuar në bashkëpunim me Drejtorinë e Policisë për Hetimin e Krimeve të Luftës dhe ekipet e Institutit për Mjekësi Ligjore, me pjesëmarrjen edhe të ekspertëve të EULEX-it. Mbetjet mortore janë dërguar për analiza mjeko-ligjore dhe të ADN-së, të cilat pritet të ndihmojnë në përcaktimin e identitetit të tyre. Aktivitetet janë zhvilluar në bazë të një urdhri gjyqësor, pas kërkesës së Policisë për Hetimin e Krimeve të Luftës, të iniciuar përmes Prokurorisë dhe Departamentit për Krime Lufte. Deri më tani, institucionet nuk kanë konfirmuar identitetin e mbetjeve mortore dhe as nëse ato u përkasin personave të zhdukur gjatë luftës në Kosovë. Gjetja e mbetjeve mortore në këtë lokacion rikthen vëmendjen te përpjekjet për zbardhjen e fatit të personave të zhdukur me dhunë gjatë luftës, një çështje që vazhdon të mbetet e hapur për familjet që presin të mësojnë të vërtetën për më të dashurit e tyre.
