Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kosova pritet të importojë gjatë vitit 2026 mallra nga Kina në vlerë prej rreth 1.1 miliard eurosh, duke shënuar rekord historik, ndërkohë që ky shtet vazhdon të mos e njohë pavarësinë e Kosovës. Shifrat e publikuara nga Aleanca Kosovare e Bizneseve (AKB) nxjerrin në pah varësinë e theksuar të tregut kosovar nga produktet e huaja dhe dështimin për të ndërtuar një ekonomi të mbështetur në prodhimin vendor.
Sipas projeksionit të AKB-së, importet nga Kina pritet të arrijnë mesatarisht rreth 3 milionë euro në ditë, 92 milionë euro në muaj dhe 1.1 miliard euro brenda vitit. Këto shifra dëshmojnë përmasat e depërtimit të produkteve kineze në tregun e Kosovës, ndërsa eksportet kosovare drejt këtij shteti mbeten pothuajse të papërfillshme. Paradoksi bëhet edhe më i theksuar kur merret parasysh fakti se Kina nuk e njeh shtetësinë e Kosovës dhe vazhdon të mbajë qëndrim kundërshtues ndaj subjektivitetit të saj ndërkombëtar. Megjithatë, tregu kosovar vazhdon të jetë një konsumator i rëndësishëm i produkteve kineze, pa arritur të krijojë një raport të baraspeshuar tregtar. Kryetari i AKB-së, Agim Shahini, ka sqaruar se këto të dhëna nuk përbëjnë thirrje për bojkot të produkteve kineze, por një alarm për gjendjen dhe orientimin e ekonomisë së Kosovës. Sipas tij, vendi duhet të ndryshojë qasjen ekonomike, duke investuar më shumë në prodhimin vendor, hapjen e vendeve të punës, rritjen e eksporteve dhe fuqizimin e bizneseve vendore për të konkurruar në tregjet ndërkombëtare. Megjithatë, një problem i tillë nuk mund të zgjidhet vetëm përmes deklaratave për rëndësinë e prodhimit vendor. Rekordi i importeve ngre pikëpyetje serioze për politikat ekonomike, mbështetjen institucionale ndaj prodhuesve, klimën e investimeve dhe mungesën e kapaciteteve prodhuese që do t’i mundësonin Kosovës të zvogëlonte varësinë nga tregjet e huaja. Kosova nuk mund të pretendojë zhvillim të qëndrueshëm ekonomik përderisa vazhdon të shpenzojë miliarda euro për produkte të importuara, ndërsa potenciali i prodhimit dhe eksportit vendor mbetet i kufizuar. AKB vlerëson se këto të dhëna duhet të nxisin debat publik dhe institucional për orientimin e politikave ekonomike e tregtare, në mënyrë që Kosova të mos mbetet vetëm treg konsumi për ekonomitë e huaja, por të ndërtojë një ekonomi prodhuese dhe konkurruese.
