Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në ditën e parë të fillimit të Vitit të ri akademik 2016-2017, kryekuvendari i Kosovës, Kadri Veseli së bashku me përfaqësues të tjerë të institucioneve arsimore e kanë vizituar Fakultetin Juridik, për t’u uruar studentëve dhe profesorëve fillimin e këtij viti. Veseli tha para studentëve se çdo gjë e mirë që i ka ndodhur Kosovës dhe çdo e arritur që nga çlirimi e deri më tani, ka kaluar përmes Universitetit të Prishtinës. Ai me theks të veçantë foli për krijimin e Ushtrisë Çlirimtare të Kosovës, për të cilën tha se zanafillën e ka nga amfiteatri i Fakultetit Juridik. Ministri Arsim Bajrami, ka deklaruar se studentët e Fakultetit Juridik janë ata të cilët në të ardhmen do të jenë hartues dhe zbatues të ligjeve, andaj i porositi ata që të punojnë shumë në mënyrë që shtetin e Kosovës ta bëjnë të barabartë në botë. Rektori i Universitetit të Prishtinës, Marjan Dema, tha me këtë rast se Universiteti që ai e drejton po bën shumë reforma në të mirë të studentëve. Para se të vizitojnë Fakultetin Juridik, ministri Bajrami së bashku me rektorin Demaj kanë vizituar konviktet dhe Mensën në Qendrën e Studentëve në Prishtinë.
