Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Partisë Demokratike të Kosovës, Kadri Veseli, ka takuar të mërkurën pasdite, anëtarët e Kryesisë së Degës së PDK-së në Komunën e Drenasit, dhe me këtë rast është prezantuar kandidati i PDK-së për kryetar të komunës, z. Ramiz Lladrovci. Anëtarët e Kryesisë së PDK-së i dhanë mbështetje unanime kandidatit për kryetar të komunës, z. Ramiz Lladrovci dhe ofruan përkrahje pa rezervë në procesin zgjedhor. Kryetari i PDK-së, Veseli ftoi të gjitha strukturat e partisë në Drenas që të punojnë së bashku dhe ditëve në vijim të përgatisin agjendën e aktiviteteve mobilizuese për aktivitetet e nevojshme për zgjedhjet e jashtëzakonshme për kryetar të Drenasit që mbahen më 4 Dhjetor 2016. Në këtë mbledhje të Kryesisë, ku i pranishëm ishte edhe kryetari Veseli, u bë edhe zgjedhja e Shtabit zgjedhor të kandidatit për kryetar të komunës, z. Ramiz Lladrovci.
Me këtë rast, kandidati për kryetar të komunës, Z. Lladrovci falënderoi të gjithë anëtarët e Kryesisë, kryetarin e deritashëm të komunës, z. Nexhat Demaku dhe strukturat tjera partiake për mbështetjen e kandidaturës së tij. Ai u zotua se do të punojë afër me të gjithë për të përgatitur gjatë ditëve në vijim agjendën e fushatës zgjedhore dhe programin zgjedhor. Lladrovci theksoi se së bashkë me strukturat e partisë dhe mbështetjen e të gjithë qytetarëve të Drenasit, do të punoj me përkushtimin maksimal që PDK-ja të vazhdojë edhe më fuqishëm qeverisjen në komunën e Drenasit, pasi sipas tij, PDK-ja është subjekti i vetëm që ofron alternativë zhvillimore për Drenasin dhe gjithë Kosovën.
