Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Mijëra qytetarë u mblodhën sot
në manifestimin e opozitës, të mbajtur në qytetin e Gjilanit. Ky manifestim masiv,
i treti me radhë pas atij në Prishtinë dhe Gjakovë, shprehu edhe njëherë kundërshtimin
ndaj Marrëveshjes për Asociacionin e Komunave me Shumicë Serbe dhe asaj për shënjimin
e kufirit me Malin e Zi. Protestuesve të pranishëm iu drejtua kreu i Nismës,
Fatmir Limaj, i cili tha se marrëveshjet nuk mund të kalojnë mbi vullnetin e
qytetarëve. “Për fatin tonë nuk do të lejojmë që një individ të vendos për
Kosovën sepse për të vendos vetë populli”, ka thënë ai. Edhe kreu i AAK-së,
Ramush Haradinaj tha para të pranishmëve në manifestim se ‘sot po luftohet për
të ndalur të keqen”. Ai u ndal edhe tek çështja e demarkacionit, për të cilën
tha se “Mali i Zi nuk po do tokë të Kosovës, e pushtetarët tanë prapë po duan t’ia
japin”. “Kosova është e gjithë qytetarëve, edhe e serbëve. Por, jo e Serbisë. Marrëveshjet
e dëmshme për vendin, Zajednica dhe Demarkacioni nuk kalojnë”, ka theksuar
Haradinaj. Ndërkaq, kreu i Vetëvendosjes, Visar Ymeri ka përsëritur se marrëveshjet
nuk do të kalojnë, pasi që ato “cenojnë qenësinë e shtetit të Kosovës”. Ai e
quajti Isa Mustafën dhe Hashim Thaçin si ‘zaptues të Republikës’ që po i
burgosin qytetarët dhe deputetët sepse po i shohin si rrezik në realizimin e
planeve të tyre. Me një fjalë rasti, protestuesve gjilanas iu drejtuan edhe
Ismajl Kurteshi nga Vetëvendosje dhe Ahmet Isufi nga AAK.
