Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kosova ndodhet në një hendek politik, nga keqqeverisja, nga pretendimet megalomane të drejtuesve të saj kryesorë për super dije e super qeverisje.
Faktet janë kokëforta dhe ato flasin me logjikën e vet, pavarësisht si bëhen përpjekje për t’ i paraqitur, për t’ i deformuar e tjetërsuar.
Fakt numër një është prishja ekstreme e raporteve me Shtetet e Bashkuara të Amerikës, jo për fajin e Uashingtonit zyrtar, sipas disa militantëve të Albin Kurtit, të cilët pretendojnë të na bindin se Amerika po dëshiron ta përfitojë Serbinë, mbi kurriz të Kosovës. Këtë e tha hapur dhe shumë qartë sh-diplomati amerikan, Thomas Contryman, i cili nuk pajtohet me konstatimin se Amerika ka qasje më të butë ndaj Serbisë. Duke folur për situatën e tensionuar në veriun e Kosovës, ai ka deklaruar se konfirmimi i shtendosjes nuk shihet në fjalë, ose në kushtet e marrëveshjes, por në veprimet e autoriteteve të Kosovës dhe të komunitetit serb. Duke folur për Zërin e Amerikës, ai është shprehur se nëse nuk është fjala për një tërheqje e plotë, atëherë së paku kjo do të bëhej duke e zvogëluar numrin e pjesëtarëve të Policisë së Kosovës, në Veri dhe lëvizje që do të tregonin një kuptim të nevojës për pajtim politik dhe vendosjen e udhëheqjes së re legjitime në komunat në veri të Kosovës. Contryman ka theksuar se nuk pajtohet me pretendimet e palës së Kosovës se komuniteti ndërkombëtar ka një lloj qasje më të butë ndaj Serbisë, për ta distancuar atë nga Rusia.
Kemi edhe një mendim ndryshe lidhur me këtë qasje. Ish-kryetari i Komitetit të Punëve të Jashtme të Dhomës së Përfaqësuesve të SHBA-së, Eliot Engel, një mik i njohur Kosovës dhe i shqiptarëve përgjithësisht në një koment të gjatë për situatën aktuale mes Kosovës dhe Serbisë, ka shkruar se Amerika po e zbut Serbinë, andaj Administrata e z. Biden duhet të ndryshojë qasjen ndaj Kosovës.
E vërteta qëndron në faktin se gabimet e Kurtit në Veriun e vendit i ka shfrytëzuar dhe po i shfrytëzon politika serbe në Beograd. Përpjekjet për ta paraqitur gjendjen në veri si kushtetuese dhe me sundim të plotë të ligjit, janë përpjekje naive dhe të mjera, sepse prej qershorit të vitit 1999, Kosova nuk pa pasur autoritet as sovranitet në atë pjesë, as ka tani me vendosjen e dy tre flamujve, apo dy tre “kryetarëve privat” të komunave, të cilët nuk përfaqësojnë asnjë segment real të qeverisjes. Është vetëm një mashtrim syhapur, me pretendime për t i bindur votuesit se Kurti po i mbanë premtimet zgjedhore.
Fakti tjetër i keq dhe skandaloz është mohimi i rolit të BE-së si organizatë pan-evropiane dhe ndikimi i saj ekonomik e politik jo vetëm në Evropë e më gjerë.
Deklaratat skandaloze të ministres së jashtme, Donika Shvarc të njohur vetëm për skandale, thellojnë hendekun me BE-në, në kohën kur krejt Kosova por edhe Qeveria Kurti, është aq fortë e lidhur pikërisht me BE-në, sepse ajo është ndërmjetësuesja e çdo marrëveshjeje që arrihet nga Kosova dhe Serbia dhe e ka qind për qind përkrahjen e Shteteve të Bashkuara të Amerikës.
Fakti më i pa skrupull deri tani është injorimi i Qeverisë së Shqipërisë, veçmas i kryeministrit Edi Rama, nga Albin Kurti dhe zhdanovistët e tij
Edhe pse Kurti ka ardhur në pushtet me kauzën e tij shumë të njohur të bashkimit kombëtar, nga e cila ka hequr dorë pasi i ka fituar zgjedhjet, dy vjet më parë, tani jo vetëm që nuk i intereson fare për kauzën, por as për Shqipërinë, ku kishte pretendime ta përçante duke aktivizuar partinë e tij, me një grup mercenarësh anarkistë e zhdanovistë të llojit të vet.
Ky qëndrim i Albin Kurtit në radhë të parë është përpjekje për thellimin e përçarjes, ndër-shqiptare, dhe, si i tillë është thjesht antikombëtar, sepse nëse Kurti thirret në 51 përqindëshin e tij, Edi Rama ka fitore dhe besimin shumë më të madh të krejt shqiptarëve, jo vetëm sa dy vitet e qeverisjes me paterica të Albinit, por qe 12 e më shumë vjet. Nëse Kurti gjithçka arsyeton mbi bazës e fitores në zgjedhjet e fundit, nuk mund t ia mohojë tjetrit fitoren edhe më të madhe, vetëm sepse ai nuk e ka në mesin e shokëve, dhe sepse nuk fitoi as edhe një deputetet me mihalaqët, ferrët, zgaqët e anarkistët e tij, në Tiranë, në pjesëmarrjen e kundërligjshme në zgjedhjet e përgjithshme, në Shqipëri.
Skandalet e dështimet e tjera janë të shumta, janë të panumërta, janë të çdo segmenti…
Qeveria e skandaleve të përgjithshme po mbijeton pikërisht me këto skandale të përditshme, pasi opozita në Kosovë është e përçarë dhe e paaftë për ta përmbysur regjimin e dështuar të Albin Kurtit.
E vetmja forcë e organizuar, e cila ka kredibilitet dhe ka arsye të fortë ta rrëzojë këtë qeveri janë veteranët, invalidët, familjarët e dëshmorëve, është populli shumicë që nuk ka marrë pjesë në zgjedhje.
Qeveria- Kurti ka hyrë në rrugë nga e cila nuk mund, nuk di as ka gatishmëri të dalë. (RKL)
20. 7. 2023
