Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Lidhjes Demokratike të Kosovës, Lumir Abdixhiku, ka reaguar ashpër pasi degët e partisë në Pejë dhe Lipjan kërkuan dorëheqjen e tij, duke i cilësuar drejtuesit e tyre si “sabotues të qëllimshëm” dhe duke kërkuar dorëheqjet e Gazmend Muhaxheri dhe Imri Ahmeti. Abdixhiku tha se do të kishte qenë më korrekte që kërkesa për dorëheqjen e tij t’i ishte bërë ballë për ballë, duke kujtuar bashkëpunimin e gjatë me dy kryetarët e degëve. Ai pranoi se rezultati zgjedhor në Pejë dhe Lipjan nuk ka qenë i kënaqshëm, por fajin e lidhi me atë që e quajti “sabotim të thellë” dhe një projekt që, sipas tij, nuk i shërben LDK-së. Abdixhiku ritheksoi se çështja e dorëheqjes së tij është mbyllur në Kuvendin e partisë më 31 janar dhe se nuk ka ndërmend të largohet nga drejtimi i LDK-së. Përkundrazi, ai kërkoi dorëheqjen morale të Muhaxherit dhe Ahmetit, duke thënë se do t’i pranonte menjëherë. “E siguroj anëtarësinë e gjerë të LDK-së se nuk do të lejojmë që projektet e ndarjeve të LDK-së nga sabotues të qëllimshëm të marrin formë. Ato dështuan më 31 janar, dështuan në zgjedhje dhe do të dështojnë edhe tash”, ka shkruar Abdixhiku. Ai theksoi se LDK-ja nuk është “konfederatë e interesave lokale” dhe as “platformë e karrierave individuale”, por një parti me karakter kombëtar, duke u bërë thirrje anëtarëve të ruajnë qetësinë dhe unitetin përballë zhvillimeve të fundit.
