Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Teksa lideri i Lëvizjes Vetëvendosje, Albin Kurti, premton gazifikimin e qymyrit si projekt strategjik për mandatin e ardhshëm, mesazhi i fundit nga Shtetet e Bashkuara duket se shkon në një drejtim tjetër, duke favorizuar partneritetin energjetik me Amerikën përmes gazit natyror të lëngshëm. Kurti deklaroi se qeveria e ardhshme synon ta shndërrojë linjitin e Kosovës në gaz, përmes bashkëpunimit me kompani ndërkombëtare dhe ekspertë amerikanë e evropianë, duke e paraqitur projektin si zgjidhje për nevojat në rritje të ekonomisë për energji. Megjithatë, në të njëjtën periudhë, e ngarkuara me punë në Ambasadën amerikane, Anu Prattipati, publikoi një mesazh të fortë diplomatik ku theksoi se Kosova gjendet përballë një zgjedhjeje strategjike për të ardhmen e saj energjetike. Në editorialin e saj, Prattipati nënvizoi se administrata e Donald Trump e konsideron prioritet reduktimin e varësisë energjetike të Evropës nga Rusia dhe i bëri thirrje Kosovës të hyjë në një partneritet afatgjatë energjetik me SHBA-në përmes LNG-së. Kritikët vlerësojnë se deklaratat e Kurtit mbeten në nivel premtimesh politike, ndërsa ende nuk është prezantuar ndonjë studim publik i fizibilitetit, kosto financiare apo afat konkret për realizimin e gazifikimit të qymyrit. Në anën tjetër, mesazhi amerikan shihet si një sinjal i qartë se Uashingtoni pret vendime strategjike që do ta lidhin Kosovën më ngushtë me interesat energjetike dhe ekonomike të Perëndimit.
