Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Paneli Zgjedhor për Ankesa dhe Parashtresa ka rrëzuar sot vendimin e Komisionit Qendror të Zgjedhjeve, duke i hapur rrugë Listës Serbe të marrë pjesë në zgjedhjet e 28 dhjetorit. PZAP-ja vlerësoi se moscertifikimi i kësaj partie ishte i paligjshëm dhe jokushtetues, një vendim i ngjashëm me dy rastet e mëhershme. Mirëpo, pavarësisht pjesëmarrjes së saj në procese zgjedhore, veprimet e Listës Serbe që nga themelimi vazhdojnë të ngjallin shqetësime serioze tek ekspertët e së drejtës kushtetuese. Arsim Bajrami, një nga hartuesit e Kushtetutës së Kosovës, paralajmëron se përdorimi sistematik i terminologjisë dhe simboleve jokushtetuese ndaj shtetit të Kosovës përbën rrezik për rendin kushtetues dhe kërkon ndërhyrje të menjëhershme nga institucionet. Sipas Bajramit, edhe kur veprimet e kësaj partie duken formale, ato në thelb mbeten në kundërshtim me Kushtetutën e Kosovës, pasi promovojnë sistemin kushtetues të Serbisë dhe mohojnë emrin zyrtar të shtetit. Ai thekson se një gjuhë e tillë nuk duhet të tolerohet në asnjë institucion publik dhe kërkon penalizim të qartë nga organet kompetente. “Refuzimi i emrit Republika e Kosovës, qoftë në deklarime publike apo në dokumente zyrtare, është i papranueshëm. Kjo qasje nacionaliste përdoret për të mobilizuar elektoratin e tyre, duke krijuar iluzionin se po mbrohen interesat e Serbisë”, deklaroi Bajrami. Çdo vendim komunal që shmang përdorimin e emrit zyrtar të shtetit mund të dërgohet në Gjykatën Kushtetuese dhe të shpallet jokushtetues.
