Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetares së gjykatës speciale, Ekaterina Trendafilova, pritet t’i bëhet ftesë zyrtare për të raportuar para Komisionit për të Drejtat e Njeriut, Barazi Gjinore, Punë, Familje, Vlerat e Luftës Çlirimtare dhe Peticione të Kuvendi i Kosovës. Kjo nismë konsiderohet si hera e parë që një deputet i Kuvendit të Kosovës kërkon raportim të kryetares së Speciales në një komision parlamentar. Propozimi është bërë nga deputeti i Partia Demokratike e Kosovës, Artan Behrami. Sipas njoftimit zyrtar, komisioni do ta shqyrtojë për votim këtë propozim të hënën në mbledhjen që nis në ora 10:00, ku në rend dite janë edhe çështje të tjera. Emri i Trandafilovës ka qenë disa herë në qendër të vëmendjes në Kosovë. Më 29 nëntor 2023, një bashkëbisedim i saj me shoqërinë civile dhe mediat në Kosovë u shoqërua me protesta jashtë hotelit ku mbahej takimi. Protesta ishte organizuar nga Partia Socialdemokrate me mbështetje nga OVL-UÇK dhe pati tensione. Po ashtu, gjatë vitit të kaluar një konferencë për media e paralajmëruar nga Trandafilova ishte anuluar për shkak të protestave të veteranëve pranë vendit ku pritej të mbahej aktiviteti. Nëse ftesa miratohet, ky do të ishte një zhvillim i ri politik në raportet mes institucioneve të Kosovës dhe Gjykatës Speciale në Hagë.
