Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Opinionisti politik Bedri Halimi ka reaguar për debatet rreth demonstratave të vitit 1981, duke vlerësuar se historia nuk mund të interpretohet përmes etiketave ideologjike, por duhet të mbështetet në fakte, dokumente dhe argumente shkencore.
Në një shkrim të publikuar në rrjetet sociale me titull “Kur historia zëvendësohet me etiketa”, Halimi kritikon qasjen që, sipas tij, redukton ngjarjet e vitit 1981 në terma si “enverizëm”, “marksizëm-leninizëm”, “stalinizëm” apo “rankoviqizëm”, duke theksuar se një qasje e tillë shmang debatin historik dhe zëvendëson argumentet me slogane.
Sipas Halimit, është paradoksale që në të njëjtin kontekst të përdoren si sinonime “enverizmi” dhe “rankoviqizmi”, pasi bëhet fjalë për dy fenomene të ndryshme historike, me interesa dhe politika shtetërore të ndryshme.
Ai ngre edhe pyetjen se, nëse organizatat ilegale të kohës do të kishin pasur si qëllim kryesor përhapjen e marksizëm-leninizmit, përse kërkesa e tyre kryesore ishte shpallja e Kosovës Republikë dhe jo vendosja e “diktaturës së proletariatit”. Halimi thekson se pjesëtarët e këtyre organizatave u përndoqën dhe u dënuan nga autoritetet jugosllave kryesisht për akuza që lidheshin me nacionalizmin dhe irredentizmin.
Po ashtu, ai vë në dukje se shumë veprimtarë shqiptarë zhvilluan aktivitetin e tyre në vendet e Evropës Perëndimore, si Gjermania, Zvicra, Belgjika, Franca dhe Suedia, duke ngritur pyetjen se përse nuk vepronin në Bashkimin Sovjetik ose në vendet e Traktatit të Varshavës, nëse orientimi i tyre do të kishte qenë ekskluzivisht prosovjetik.
Historiani argumenton se ngjarjet e vitit 1981 duhet të analizohen mbi bazën e dokumenteve historike, proceseve gjyqësore, programeve politike të organizatave, rrethanave ndërkombëtare dhe dëshmive, e jo përmes etiketimeve ideologjike.
Sipas Halimit, debati kryesor duhet të përqendrohet te vlerësimi i kërkesës për Republikën e Kosovës, ndërsa thekson se kritikët e demonstratave shpesh fokusohen te emërtimet e organizatave apo terminologjia e kohës, në vend se të trajtojnë thelbin politik dhe historik të kërkesave të vitit 1981.
Në përfundim, ai shprehet se historia vazhdon të mbështetet mbi fakte dhe se ato, sipas tij, nuk ndryshojnë pavarësisht interpretimeve apo etiketave që u vendosen.
