Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Heinz-Christian Strache ka deklaruar se Austria është kundër anëtarësimit të Kosovës në INTERPOL dhe kundër krijimit të ushtrisë së Kosovës. Zëvendëskancelari austriak thotë se është kundër anëtarësimit të Kosovës në INTERPOL dhe kundër krijimit të ushtrisë së Kosovës. Deklaratat e tij erdhën pas bisedimeve me disa prej krerëve të shtetit serb dhe Ministrin e Punëve të Jashtme, Ivica Daçiq në Vjenë. Në një konferencë për media, Strache ka thënë se në lidhje me anëtarësimin e Kosovës në INTERPOL dhe formimin e ushtrisë së saj nuk mund të jepet një përgjigje derisa çështja e Kosovës të mos zgjidhet në nivel të Kombeve të Bashkuara. “Derisa nuk kemi zgjidhje në përputhje me Rezolutën 1244, e që është e detyrueshme për të dyja palët, nuk mund të flasim për anëtarësim në INTERPOL ose ushtri. Pa zgjidhje e cila është në përputhje me Rezolutën 1244 nuk ka hapa të mëtutjeshëm”, theksoi Strache. “Ekzistojnë iniciativa që mund të dërgojnë tek marrëveshja, nëse të dyja palët janë me vullnet të mirë dhe mbi të gjitha nëse bashkësia ndërkombëtare i pranon rezultatet e marrëveshjes”, u shpreh ai. Sa i përket temës për korrigjimin e kufijve, Strache ka thënë se është një temë që kërkon zgjidhje të qetë, në përputhje me marrëveshje, ku mund të llogaritet në mbështetjen e Austrisë. Strache ka theksuar se duhet kuptuar se Kosova ka interes të madh për Serbinë dhe se është një çështje që kërkon trajtim serioz.
