I dyshuari për spiunazh nga Dragashi pranon bashkëpunimin me BIA-n serbe, Gjykata i cakton një muaj paraburgim

Gjykata Themelore në Prishtinë i ka caktuar masën e paraburgimit prej një muaji të dyshuarit Fehim Sali, një arsimtar nga komuna e Dragashit dhe ish-anëtar i Këshillit Konsultativ për Komunitete pranë Zyrës së Presidentes, i cili u arrestua nën dyshimet për spiunazh në favor të inteligjencës serbe (BIA). Sipas kërkesës së Prokurorisë Speciale, i pandehuri – i cili hetohej që nga qershori i vitit të kaluar pas informacioneve të siguruara nga AKI-ja – ka pranuar plotësisht gjatë intervistimit veprimtarinë e tij inkriminuese, duke detajuar se ka vepruar nën udhëzimet e zyrtarit të BIA-s, Zhelimir Matoviq (“Zheljko”). Prokurori i rastit, Bekim Kodraliu, bëri të ditur se Sali ka ofruar informacione mbi situatën politike, ka fotografuar zyrtarë të AKI-së, si dhe ka identifikuar persona të caktuar si objektiva potencialë për rekrutim nga BIA. Meqenëse pozita e tij shtetërore e mëparshme mund t’i kishte lehtësuar qasjen në informacione të ndjeshme, si dhe nisur nga provat e sekuestruara gjatë bastisjeve, organet e drejtësisë e vurën nëvizë caktimin e paraburgimit si masë të domosdoshme në këtë fazë hetimore, në kuadër të një sërë aksioneve të fundit kundër rrjeteve të spiunazhit në vend.

Kontrolloni gjithashtu

Daut Haradinaj me mesazh prekës për Jakup Krasniqin: Do ta ndaja një pjesë të jetës për të të zëvendësuar

Gjeneral Daut Haradinaj ka publikuar një mesazh me tone të thella emocionale kushtuar ish-zëdhënësit të …