Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Historiani britanik James Pettifer ka thënë se Kosova duhet ta rishikojë raportin me misionet ndërkombëtare pas aktgjykimit të Dhomave të Specializuara në Hagë ndaj ish-krerëve të UÇK-së, veçanërisht rolin e EULEX-it dhe OSBE-së. Në një intervistë për Radion Evropa e Lirë, Pettifer tha se Kosova nuk duhej ta refuzonte themelimin e Speciales, por duhej të negocionte më mirë kushtet e funksionimit të saj. Sipas tij, problemi qëndronte në faktin se gjykata u krijua pa kontroll të mjaftueshëm nga institucionet e Kosovës. Pettifer vlerësoi se aktgjykimi mund ta vështirësojë edhe më tej pajtimin mes shqiptarëve dhe serbëve, ndërsa theksoi se reagimi i Kosovës duhet të jetë institucional dhe paqësor. Ai tha se NATO-ja duhet të mbetet e veçuar nga kjo çështje, ndërsa vazhdimi i misioneve evropiane në Kosovë duhet të rishikohet. Duke folur për historinë e UÇK-së, Pettifer tha se aktgjykimi nuk duhet të përcaktojë mënyrën se si shkruhet dhe kujtohet lufta e Kosovës. Ai shtoi se institucionet duhet të kenë një qëndrim të qartë dhe të përbashkët për të ardhmen e misioneve ndërkombëtare në vend.
