Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Protesta në Tiranë u shndërrua në përplasje të dhunshme, ndërsa protestuesit u zhvendosën në disa zona të kryeqytetit dhe sulmuan institucione publike, biznese e banka. Policia përdori autobotë me ujë me presion dhe gaz lotsjellës për t’i shpërndarë. Sipas Associated Press, trazirat zgjatën mbi tetë orë; autoritetet raportuan 35 të ndaluar dhe 29 persona të lënduar, mes tyre 23 policë. Associated Press Dhuna nisi pranë Ministrisë së Arsimit, ku protestues të maskuar hodhën gurë e mjete të tjera drejt godinës. Disa shkulën kangjellat e trotuarit dhe i përdorën për të goditur institucionin. Përplasjet më pas u zhvendosën në Rrugën e Durrësit, ku u dëmtuan biznese private dhe u dogj një bankë. Në Sheshin “Skënderbej” u dogjën stola dhe kazanë mbeturinash. Në Ministrinë e Ekonomisë, protestuesit hynë në katin e parë, thyen xhama, shkulën dyer dhe nxorën orendi jashtë godinës. U dëmtua edhe Ministria e Brendshme.
Protestuesit u ndanë në disa grupe dhe marshuan përgjatë Bulevardit “Dëshmorët e Kombit”. Dëme u raportuan te Piramida e Tiranës, ku u thyen xhama dhe u dogjën pjesë të ambienteve; aty u sulmua edhe një bankë tjetër. Pranë Kryeministrisë u dogjën pemët te hyrja anësore e godinës. Më pas, protesta u zhvendos pranë ndërtesës ku ndodhen Kryesia e Kuvendit dhe Gjykata Kushtetuese. Protestuesit tentuan të hynin në godinë, ndërsa më pas dëmtuan dhe dogjën biznese në katet e para të “Kullave Binjake”. Sulme dhe zjarr pati edhe në Ministrinë e Drejtësisë, ku u thyen xhamat dhe u dogj kati i parë. U dëmtua gjithashtu qendra tregtare pranë Kalasë së Tiranës. Tensione u raportuan edhe pranë Komisariatit nr. 2, ku u dogj një automjet policie dhe u lënduan dy efektivë. Në Rrugën e Elbasanit dhe te Zogu i Zi u shkatërruan rrethime e sinjalistikë rrugore. Protestuesit u shpërndanë rreth orës 22:00. Përshkallëzimi i dhunës u shënua gjatë protestave që vijuan për të dytën ditë në kryeqytet. Associated Press raportoi dëme në të paktën katër ministri dhe përplasje të përsëritura mes protestuesve dhe policisë. Associated Press
