Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i komunës së Mitrovicës, Agim Bahtiri, ka vizituar të shtunën fshatin Rashan të Shalës së Bajgorës, me ftesën e qytetarëve të tij. Banorët e Rashanit kishin ftuar kryetarin Bahtiri për ta vizituar fshatin e tyre me qëllim që për së afërmi të njoftohet me gjendjen në fshat dhe problemet me të cilat ata po ballafaqohen.
Rashanasit i thanë kryetarit Bahtiri se meremetimi i rrugës kryesore, asfalti i së cilës është dëmtuar shumë dhe rregullimi i rrugëve përbrenda fshatit që lidhin lagjet me rrugën kryesore, janë prioritet. Ata po ashtu kërkuan ndihmë edhe për rregullimin e ujësjellësit, kanalizimit etj.
Kryetari Bahtiri, pasi tha se mirëkupton shqetësimet dhe kërkesat e banorëve të Rashanit, foli për punën që ai dhe kabineti i tij, por edhe e tërë administrata komunale po bënë për të përmirësua jetën e qytetarëve.
Ai premtoi ndihmë për zgjidhjen e problemeve të Rashanasve, duke shtuar se kjo do të bëhet së shpejti dhe gradualisht. “Më duhet të them se probleme të tilla kanë edhe banorët tjerë të lagjeve e fshatrave, andaj ne po punojmë me plan që të përmbushim kërkesat e qytetarëve, por duke pas njëfarë rendi e prioriteti”.
Kryetari Bahtiri, ka inspektuar edhe punimet për rregullimin e rrugës në fshatin Rekë, ku njëkohësisht ka shpërnda edhe kontejnerët për rreth 200 familjet e atyshme.
Para qytetarëve të këtij fshati, kryetari Bahtiri tha se ai dhe bashkëpunëtorët e tij që nga fillimi kanë qenë dhe janë në shërbim të qytetarëve.
“Do të jemi vazhdimisht afër qytetarëve, për të ndihmuar ata që të zgjedhin problemet e tyre. Edhe kjo punë që sot po bëhet në rrugën tuaj e vërteton atë që thash. Por, sot kemi bërë edhe një punë shumë të mirë këtu. Kontejnerët që ua shpërndamë falas, do të kontribuojnë që ju tani e tutje të mbani ambientin më të pastër, e sidomos lumin që është një pasuri e madhe”, ju tha banorëve të Rekës, kryetari Bahtiri.
