Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Zëdhënësi i Aleancës për Ardhmërinë e Kosovës, Kushtrim Xhemaili, ka kritikuar përmes ironisë qeverisjen e Lëvizjes Vetëvendosje, duke i përdorur sloganet e kësaj partie për të vënë në pah, sipas tij, mospërputhjen ndërmjet premtimeve politike dhe zhvillimeve gjatë gjashtë viteve të fundit. Xhemaili ka përmendur sloganet “Me zemër”, “Erdhi dita”, “Krejt dhe drejt” dhe “Bashkë Qeverisim”, duke i ndërlidhur me pretendimet për punësime partiake në KEK, shtrenjtimin e energjisë elektrike dhe mbi një miliard euro të shpenzuara për importin e saj. Ai ka përfshirë në ironinë e tij edhe sloganet “Cep më cep”, “Mos lësho pe” dhe “Krejt për shtet, shtet për krejt”, të cilat i ka lidhur me paralajmërimet për vështirësi në furnizimin me energji, përgjimet e publikuara dhe pretendimet për keqpërdorime. Përmes këtij reagimi, zëdhënësi i AAK-së ka vënë në shënjestër atë që e konsideron hendek ndërmjet retorikës së Vetëvendosjes dhe rezultateve të qeverisjes së saj. Në fund, Xhemaili i është drejtuar Prokurorisë me thirrjen: “Prokuroria, provat janë publike, qitja pikën!” Pretendimet e tij për punësime partiake dhe keqpërdorime janë pjesë e reagimit politik dhe kërkojnë trajtim e verifikim nga organet kompetente.
