Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Nënkryetari i LDK-së, Lutfi Haziri, u ka bërë thirrje delegatëve të partisë që të mos përfshihen në përplasjet e brendshme politike në prag të Kuvendit të jashtëzakonshëm zgjedhor. Përmes një reagimi në Facebook, Haziri tha se çështja e votëbesimit ndaj kryetarit të LDK-së, Lumir Abdixhiku, duhet të zgjidhet nga delegatët në kutinë e votimit dhe jo përmes polemikave publike. Ai kritikoi pozicionimet e shumta brenda partisë, duke theksuar se ato po i shkaktojnë dëm LDK-së dhe po e largojnë vëmendjen nga rivalët politikë. “Mos hyni në beteja që nuk janë tuajat”, shkroi Haziri, duke shtuar se nënshkrimet për thirrjen e Kuvendit tashmë janë dorëzuar dhe se debatet e ashpra, statuset e shumta në rrjetet sociale dhe thirrjet për protesta vetëm sa po e gërryejnë besimin e anëtarësisë. Haziri vlerësoi se është më mirë të pranohen gabimet e së kaluarës sesa të vazhdohet me to, duke theksuar se LDK-ja ka arritur sukseset më të mëdha kur ka qenë e bashkuar. Një grup i të pakënaqurve në LDK ka dorëzuar nënshkrimet për thirrjen e Kuvendit të jashtëzakonshëm, me synim shkarkimin e Lumir Abdixhikut nga posti i kryetarit. Nga LDK-ja kanë bërë të ditur se data e mbajtjes së Kuvendit pritet të caktohet së shpejti. Ndërkohë, Lumir Abdixhiku ka pezulluar bisedimet me Lëvizjen Vetëvendosje për një koalicion të mundshëm qeverisës.
