Prokurori i Shtetit ka njoftuar se ka përfunduar të gjitha përgatitjet e nevojshme për mbrojtjen e votës së lirë dhe garantimin e integritetit të procesit zgjedhor në zgjedhjet e parakohshme parlamentare të 7 qershorit. Sipas njoftimit të Zyrës së Kryeprokurorit të Shtetit, në mbarë territorin e Kosovës do të angazhohen mbi 100 prokurorë dhe zyrtarë të sistemit prokurorial, të cilët do të jenë në detyrë gjatë gjithë procesit të votimit dhe numërimit. Prokuroria ka bërë të ditur se ekipet e angazhuara do të monitorojnë procesin zgjedhor dhe do të veprojnë ndaj çdo parregullsie apo dyshimi për keqpërdorim të votës. “Prokurori i Shtetit ka bërë të gjitha përgatitjet e nevojshme për të realizuar mbrojtjen e votës së lirë të qytetarëve, duke garantuar integritetin e procesit zgjedhor”, thuhet në njoftim. Njëkohësisht, Prokurori i Shtetit u ka bërë thirrje qytetarëve, subjekteve politike, institucioneve dhe organizatave që të raportojnë çdo rast të dyshuar të manipulimit apo keqpërdorimit të votës tek organet kompetente. Sipas Prokurorisë, çdo informacion lidhur me parregullsi zgjedhore do të trajtohet me prioritet, me qëllim të ruajtjes së ligjshmërisë dhe besueshmërisë së procesit zgjedhor.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
