Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Me rastin e 20-vjetorit të Masakrës së Burimit, nën përkujdesjen e Kryetarit të Komunës së Malishevës, Ragip Begaj, do të mbahet tubim përkujtimor. Tubimi mbahet të dielën më 31.3.2019, duke filluar nga ora 11:00, në vendin e ngjarjes (Vrella e Mëhillit) në fshatin Burim.
Ndër aktivitetet që do të zhvillohen me këtë rast janë:
Fjala e Kryetarit të Komunës, Ragip Begaj,
Fjala e Kryesuesit të Kuvendit të Komunës.
Fjala e përfaqësuesit të familjeve të martirëve të Masakrës së Burimit
Vënia e gurëthemelit të Kompleksit Memorial në Burim.
Homazhe te varrezat e martirëve në Dragobil, në orën 12:00.
***
Më 31 mars të vitit 1999, pas vazhdimit të bombardimit të NATO-s mbi caqet ushtarake dhe ekonomike të Serbisë, forcat barbare të këtij shteti kriminal vranë e masakruan mizorisht 42 banorë në fshatin Burim, ish Joviq të Malishevës. Ishte kjo masakra më barbare e kryer mbi shqiptarët në vendin e quajtur te “Vrella e Mëhillit”. Serbët atë ditë kishin grumbulluar në një vend 42 qytetarë të pafajshëm, kryesisht nga fshatrat Dragobil dhe Astrazup si dhe të tjerë të cilët kishin qenë të strehuar në këtë pjesë, gjatë luftës në Kosovë. Më pas kishin filluar pushkatimin masiv të tyre, si dhe dhunimin barbar të kufomave. Në javën e fundit të marsit të vitit 1999, ushtarët dhe policët serbë kishin vrarë e pushkatuar më shumë se 1000 civilë shqiptarë, ndërkohë që kishin intensifikuar edhe dëbimin e dhunshëm masiv të shqiptarëve nga Kosova në drejtim të Shqipërisë dhe Maqedonisë.
