Në Gllogjan u shënua 27-vjetori i Epopesë së Dukagjinit

24/03/2025 Institucionet

Në Gllogjan të Deçanit është mbajtur manifestimi Qendror i Epopesë së Dukagjinit në  shënim të 27 vjetorit të Epopesë së lavdishme të Dukagjinit dhe 26 vjetorit të ndërhyrjes ushtarake të NATO-s.

Në fjalën e tij kryetari i Deçanit Bashkim Ramosaj ka thënë se 24 marsi i vitit 1998 është datë në të cilën historia e popullit tonë mori kthesën e duhur dhe rrugën drejt lirisë, për të cilën punuan dhe u sakrifikuan shumë breza.

Kjo datë, tha kryetari Ramosaj na kujton vuajtjet, vetëmohimin, krenarinë dhe përkushtimin për mbrojtjen e identitetit tonë, vlera që kanë qëndruar të forta përtej kohës, nëpër shekuj.

Që një datë të jetë historike e të nderohet përjetësisht, patjetër që duhet të ketë heronjtë e luftëtarët e saj. Heronjtë dhe dëshmorët e kësaj dite të dhimbshme dhe madhështore.

E them e dhimbshme sepse atë ditë ranë tre bashkëluftëtarë të Luanit të UÇK-së, Gazmend Mehmetaj, Himë Haradinaj e Agron Mehmetaj.

Humbja e tyre vazhdon të jetë një plagë e thellë në zemrat tona dhe një burim krenarie kombëtare.

Heronjtë e gjallë të asaj dite nën emblemën e UÇK-së, familja e shenjtë e Haradinajve bëri atë që përgjatë historisë sonë si komb ishte e pa parë dhe e pa dëgjuar ndonjëherë.

Ai tha se është shumë e vështirë ta thuash me fjalë historinë prej luftëtari që bëri atë ditë Komandanti i Zonës Operative të Dukagjinit, Gjenerali Ramush Haradinaj.

Në këtë ditë lindi dhe u brumos shpresa jonë, që liria për ne tashmë kishte ardhur pavarësisht çmimit të madh që paguam si komb.

Nderim përjetësisht 24 Marsit të Ushtrisë Çlirimtare të Kosovës dhe familjes emblematike të Hilmi Haradinaj!

Lavdi e nderim përjetësisht për dëshmorët dhe martirët e kombit!

Mirënjohës pafundësisht për 24 Marsin e vitit 1999, ndërhyrjes së trupave të NATO-s, prirë nga Shtetet e Bashkuara të Amerikës, ka thënë në fund të fjalës së tij, kryetari i komunës së Deçanit, z. Bashkim Ramosaj!

Kontrolloni gjithashtu

Në Mirash po vazhdojnë me intensitet të shtuar punimet për ndërtimin e rrugës kryesore  

Punimet për ndërtimin e rrugës kryesore në fshatin Mirash të komunës së Ferizajt po vazhdojnë …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2025, Të gjitha të drejtat e rezervuara